ინდონეზიაში, კუნძულ ლომბოკზე ძლიერი მიწისძვრის შედეგად გარდაცვლილთა რიცხვი 400-ს აჭარბებს. შენობათა ნანგრევებში გარდაცვლილთა ცხედრებს კვლავ ეძებენ. ამის შესახებ ინფორმაციას სახელმწიფო უწყებები ავრცელებენ.

მიწისძვრის შედეგად გარდაცვლილთა ზუსტი რიცხვი 436-ია. ამასთან, 1,3 ათასზე მეტი ადამიანი დაშავდა, დაახლოებით 353 ათასი კი უსახლკაროდ დარჩა. ყველაზე კრიტიკულ მდგომარეობაში კუნძულის ჩრდილოეთი ნაწილია, სადაც 374 ადამიანი გარდაიცვალა და 137 ათასი მოსახლე იძულებული გახდა, დაეტოვებინა სახლი.

უსახლკაროდ დარჩენილთა უმეტესობა იმ კარვებში ცხოვრობს, რომლებიც დანგრეულ სახლებსა და საევაკუაციო თავშესაფრებთან ახლოსაა განლაგებული. სპეციალური სამედიცინო სამსახურები დაშავებულების დახმარებას ცდილობენ.

6,9 მაგნიტუდის მიწისძვრა ინდონეზიაში 5 აგვისტოს მოხდა. კატასტროფამ ათიათასობით სახლი, მეჩეთი და ბიზნესცენტრი დააზიანა. რამდენიმე დღის შემდეგ, 9 აგვისტოს კუნძულზე 6,2 მაგნიტუდის განმეორებითი მიწისძვრა დაფიქსირდა, რომელმაც 17 ადამიანის სიცოცხლე იმსხვერპლა.