პარტია ქართული ოცნების წევრის, ეკა ბესელიას თქმით, სალომე ზურაბიშვილი საფრანგეთის მოქალაქეობაზე უარს ამბობს. სწორედ სალომე ზურაბიშვილი განიხილება იმ დამოუკიდებელ საპრეზიდენტო კანდიდატად, რომელსაც მმართველი გუნდი არჩევნებზე მხარს დაუჭერს.

"ჩვენ საარჩევნო კოდექსში გვაქვს ასეთი დათქმა, რომ პრეზიდენტობის კანდიდატს, რომელიც არ შეიძლება იყოს სხვა ქვეყნის მოქალაქე, რეგისტრაციის პროცესში უნდა ჰქონდეს მიმართვა იმ ქვეყნისთვის მოქალაქეობიდან გამოსვლის თაობაზე, რომლის მოქალაქეობაც აქვს", - აღნიშნა ბესელიამ ჟურნალისტებთან საუბრისას.

მისივე განცხადებით, თუ სალომე ზურაბიშვილი თავის კანდიდატურას საპრეზიდენტო არჩევნებზე წარადგენს, მას პირველივე ტურში გამარჯვების ყველაზე მაღალი შანსი ექნება.

"ის [სალომე ზურაბიშვილი] ძალიან გამოცდილი პოლიტიკოსია. განსაკუთრებით იმ კანდიდატებს რომ ვუყურებ, რომლებიც სახელდება, უფრო მიმყარდება ეს განცდა", - თქვა ბესელიამ.

ეკა ბესელიამ გუშინ, 30 ივლისს ჟურნალისტებთან საუბრისას აღნიშნა, რომ ქართული ოცნება მას შემდეგ დაასახელებს საპრეზიდენტო კანდიდატს, რაც ყველა სხვა კანდიდატი გახდება ცნობილი. მისივე თქმით, მას მოსწონს იდეა, რომ საპრეზიდენტოდ დამოუკიდებელი ქალი კანდიდატი დასახელდეს.

მსგავსი განცხადება ქართული ოცნების თავმჯდომარე ბიძინა ივანიშვილმა 24 ივლისს პირველ არხთან მიცემულ ინტერვიუში გაავრცელა. ივანიშვილი ამბობდა, რომ მისი პოზიციაა, დამოუკიდებელ კანდიდატს დაუჭირონ მხარი და თუ ასე არ იქნება, მაშინ "ოპოზიციამ გაინაწილოს ეს მანდატი".

ანალოგიურად ფიქრობს საქართველოს პრემიერ-მინისტრი მამუკა ბახტაძე. მისი თქმით, თუ კი ქართულ ოცნებას საკუთარი კანდიდატი არ ეყოლება, ეს დემოკრატიისთვის უკეთესი იქნება.

ჯერ კიდევ უცნობია როდის ჩატარდება საპრეზიდენტო არჩევნები. ამის გამო, ეროვნულ დემოკრატიულმა ინსტიტუტმა პრეზიდენტს რეკომენდაციებით მიმართა, სადაც ისინი მოუწოდბენ მარგველაშვილს, რაც შეიძლება მალე გამოაცხადოს არჩევნების თარიღი.