ხორავას ქუჩის საქმეზე შექმნილი საგამოძიებო კომისიის წევრის, ოთარ კახიძის თქმით, მიხეილ კალანდია სისხლისსამართლებრივ დევნას უნდა დაექვემდებაროს. მისი განცხადებით, საგამოძიებო კომისიის ეს რეკომენდაცია კალანდიას წინააღმდეგ არსებული მტკიცებულებების გათვალისწინებით ჩამოყალიბდა.

ოთარ კახიძის თქმით, მიხეილ კალანდია ის პირია, ვინც მოკლულ დავით სარალიძესთან ერთად იყო შემთხვევის ადგილზე და ფარდულში მთელი ჩხუბის განმავლობაში, იჭერდა და ურტყამდა მას.

"როგორც ირკვევა, არსებობს რვა მოწმის მტკიცებულება და მ.კ.-ს აღიარებითი ჩვენება, რომ ის არის მკვლელობაში თანამონაწილე.", - ამბობს კახიძე საქმის გარემოებებთან დაკავშირებით.

კახიძის განცხადებით, აღნიშულ ინფორმაციას იუწყებიან პროკურორები, რომლებიც კალანდიას მხილებისთვის საჭირო ღონისძიებებს არ ატარებენ და ამბობენ, რომ სარალიძის მკვლელობაში დამნაშავეა გ.ბ.

მიხეილ კალანდიას სისხლისსამართლებრივ პასუხისმგებლობაზე აქამდე საგამოძიებო კომისიის თავმჯდომარე, სერგი კაპანაძეც საუბრობდა. მისი თქმით, პასუხისმგებლობა შეიძლება დავით სარალიძის ჯგუფურ მკვლელობაში თანამონაწილეობის კუთხით დამდგარიყო. ხორავას ქუჩის საქმის პროკურორის განცხადებით კი, მიხეილ კალანდიას მამხილებელი ვერაფერი იპოვეს.

კალანდიას დაკავებას მოითხოვდა მოკლული დავით სარალიძის მამა, ზაზა სარალიძეც. ის 2 ივლისს შინაგან საქმეთა სამინისტროს შენობასთან მივიდა. სარალიძის თქმით, ტერიტორიას არ დატოვებდა მანამ, სანამ არ დააკავებდნენ მიხეილ კალანდიას, რომელსაც მისი შვილის მკვლელად მიიჩნევდა. სარალიძემ ღამე შსს-ს ეზოში გაატარა და უწყება მას შემდეგ დატოვა, რაც სამინისტროში პირობა მისცეს, რომ კვირის ბოლომდე რადიკალურ ნაბიჯებს გადადგამდნენ.