თბილისის მერის, კახა კალაძის განცხადებით, თბილისის მერია მიწისქვეშა პარკინგის მოსაწყობად, დაინტერესებულ პირებს მიწის ნაკვეთებს 25-წლიანი იჯარის ნაცვლად, საკუთრებაში გადასცემს.

კალაძის განცხადებით, რადგანაც მიწისქვეშა პარკინგის მოწყობასთან დაკავშირებით გამოცხადებული ინტერესთა გამოხატვა სასურველი შედეგით ვერ დასრულდა, მიმდინარე კვირაში კიდევ ერთხელ და შეცვლილი პირობებით გამოცხადდება.

"არის მოცემული სამი ლოკაცია - "სადგურის მოედნის", მეტროსადგურ "ვარკეთილისა" და გეგეშიძის სკვერის ტერიტორიები, რომლებიც ბაზრის კვლევის საფუძველზეა შერჩეული და სწორედ ის ადგილებია, სადაც მოსახლეობის მოთხოვნა საკმაოდ მაღალია. აქედან გამომდინარე, თბილისის მერია მზადაა, კერძო სექტორთან და ბიზნესთან ერთად, მიმდინარე კვირაში ინტერესთა გამოხატვა კიდევ ერთხელ გამოაცხადოს", - განაცხადა დედაქალაქის მერმა.

მისივე თქმით, არის მოლოდინი, რომ ამჯერად, ბიზნესის მხრიდან ინტერესის გამოხატვა მაღალი იქნება.

"ძალიან დიდი იმედი მაქვს, რომ ბიზნესი დაინტერესდება. ამასთან, გამოცხადებული გვქონდა, რომ მიწის ნაკვეთებს დაინტერესებულ პირებს 25-წლიანი იჯარით გადავცემდით, თუმცა ამას ვცვლით და ნაკვეთებს ერთ ლარად, საკუთრებაში გადავცემთ", - აღნიშნა კახა კალაძემ.

დედაქალაქის მერის განცხადებით, ჯამურად, სამივე ლოკაციის შემთხვევაში, 715 ავტომობილისთვის განკუთვნილი მიწისქვეშა პარკინგის მოწყობა იგეგმება.