ხორავას ქუჩის საქმეზე პარლამენტის საგამოძიებო კომისიის თავმჯდომარის სერგი კაპანაძის თქმით, საქმეზე პროკურორისა და შსს-ს ვერსიების გამო თავს მოტყუებულად გრძნობს.

სერგი კაპანაძემ დღეს, 3 ივლისს განაცხადა, რომ პროკურორ ზვიად ფხაკაძისა და საქმის უშუალო გამომძიებლის, ირაკლი ფიფიას ვერსიებს შორის განსხვავებაა. საქმე ეხება მოწმის, მიხეილ კალანდიას ზუსტ ადგილმდებარეობას, როდესაც ბრალდების ვერსიით, გ.ბ. დანას ურტყამდა დათო სარალიძეს.

"გულწრფელად გეტყვით, რომ ამით ვარ გაღიზინებული. თავ ვგრძნობ მოტყუებულად. აქ მოვიდა პროკურორი, მოგვიყვა ერთი ვერსია იცავდა ამას კბილებით, შეეცადა, რომ ეს დაგვეჯერებინა. მოვიდა შინაგან საქმეთა სამინისტრო და თურმე სხვა ვერსია ყოფილა", - განაცხადა კაპანაძემ.

კომისიაში მიცემული პროკურორ ზვიად ფხაკაძის ჩვენებით, მიხეილ კალანდია 8-9 მეტროს მოშორებით იყო, როდესაც გ.ბ. სარალიძეს დანას ურტყამდა. შსს-ს კომისიაში გაჟღერებული ვერსიით კი, კალანდია მაშინვე შეყვა ფარდულში მოჩხუბარ სარალიძესა და გ.ჯ.-ს.

კაპანაძის თქმით, ის გაღიზიანებულია იმით, რომ შსს-ს მაღალჩინოსანი, იოსებ სიგუა სხდომას არ დაესწრო და ამის შესახებ წინასწარ არ შეატყობინეს.