საქართველოს ჯანდაცვის მინისტრის, დავით სერგეენკოს განცხადებით, თანხების დაზოგვის ძირითადი რესურსი გადაწყვეტილების დაბადებიდან მის განხორციელებამდე დროის მნიშვნელოვნად შემცირება იქნება.

მინისტრის თქმით, ხარჯების შესამცირებლად რამდენიმე მიმართულება მოიაზრება, რაც შესაძლოა უკავშირდებოდეს თანამშრომლების ან რაიმე სხვა ტიპის ხარჯების შემცირებას.

"სამინისტროების გაერთიანების შემთხვევაში ეს ორი მიმართულება არ არის დომინანტი... ფუნქციების განმახორციელებელი დიდი ალბათობით არ შემცირდება. მინისტრი არის პასუხისმგებელი ყველაფერ იმაზე, რაც ხორციელდება მისი კონტროლის ფარგლებში. მინისტრი ვერ იტყვის, რომ კომუნიკაცია ვერ შედგა და ვერ მოვასწარი გაკეთება: "იცით რა, მე კი ვუთხარი, მაგრამ იმან არ გააკეთა და აბა, მე რა ვთქვა". მინისტრი ყველაზე მაღალი პოლიტიკური პასუხისმგებლობის მქონე პირია", - განაცხადა ჯანდაცვის მინისტრმა.

სერგეენკოს თქმით, როცა ერთი მინისტრი ხდება პასუხისმგებელი რამდენიმე მიმართულებაზე, ის იძულებულია, რომ მართვის მოდელები ეფექტიანი გახადოს, რაც ნიშნავს, რომ იგივე რესურსებით მეტი შედეგი მოიპოვოს ან ნაკლები რესურსებით იგივე შედეგი მიიღოს.

"გადაწყვეტილებების დაბადებიდან მის განხორციელებამდე დრო უნდა შემცირდეს მნიშვნელოვნად. აი, ეს არის ძირითადი რესურსი, რეზერვი, რითაც თანხები დაიზოგება", - განაცხადა ჯანდაცვის მინისტრმა.

ის არ ფიქრობს, რომ სამინისტროების შერწყმის გამო ინფრასტრუქტურა გამოთავისუფლდება, რადგან ადამიანები, რომლებიც ახლა არიან დასაქმებულები, აგრძელებენ მუშაობას.