საქართველოს პრემიერ-მინისტრის გიორგი კვირიკაშვილის განცხადებით, ხორავას ქუჩაზე მომხდარი მკვლელობა და სასამართლოს განაჩენი პოლიტიკურად ანგაჟირებულმა ჯგუფებმა გამოიყენეს. ამის შესახებ პრემიერმა მთავრობის სხდომის დაწყებამდე განაცხადა.

მისი თქმით, ამ ჯგუფებმა გამოიყენეს ეს სიტუაცია და აბსოლუტურად არამართლზომიერ, ვითარებისადმი არაადეკვატურ მოთხოვნებს აყენებდნენ და აყენებენ.

"საზოგადოება ყველაფერს კარგად ხედავს. ამ საზოგადოებას უცხოვრია იმ სახელმწიფოში, სადაც სახელმწიფო აბსოლუტურად არ უსმენდა ხალხის ხმას, სადაც თვეების განმავლობაში ქუჩაში დგომის მიუხედავად, რეაგირება ნულის ტოლი იყო. დღეს ჩვენ გვაქვს სახელმწიფო, სადაცა ხელისუფლებას ადარდებს ხალხის აზრი", - განაცხადა პრემიერმა.

მისი თქმით, ხელისუფლებას შეცდომები აქვს, რადგან უშეცდომო არავინ არის, მაგრამ ამ შეცდომებზე ხდება ადეკვატური რეაგირება, საპასუხო პოლიტიკური ქმედებების დაგეგმვა.

"კიდევ ერთხელ ვამბობ, ტენდენცია არის ყველაზე მნიშვნელოვანი და ტენდენცია ჩვენს ქვეყანაში არის დემოკრატიული და სამართლებრივი სახელმწიფოს მშენებლობა", - აცხადებს კვირიკაშვილი.

ამავე თემაზე: