საქართველოს პარლამენტის თავმჯდომარემ ირაკლი კობახიძემ პარლამენტის ბიუროს სხდომაზე განაცხადა, რომ ხვალ, 6 მაისს გაიმართება რიგგარეშე სხდომა, სადაც საბოლოოდ ჩამოყალიბდება 2017 წლის 1 დეკემბერს თბილისში, ხორავას ქუჩაზე მომხდარი დანაშაულის შედეგად ორი ახალგაზრდის მკვლელობის ფაქტის შემსწავლელი დროებით საგამოძიებო კომისია.

კომისიის შემადგენლობა 17 წევრით განისაზღვრა. პარლამენტის თავმჯდომარემ ხორავას ქუჩის საქმეზე დროებითი საგამოძიებო კომისიის შექმნასთან დაკავშირებით, უმრავლესობასა და უმცირესობას შორის გამართული კონსულტაციის დროს მიღებული შეთანხმება განმარტა.

შეთანხმების თანახმად, კვოტების მიხედვით, 6 ადგილი კომისიაში ეკუთვნის უმცირესობას - ევროპულ საქართველოს თავისი ფრაქციებით, ერთი ეკუთვნის პატრიოტთა ალიანსს.

"ვიცით, რომ ნაციონალური მოძრაობა არ შემოდის, თუმცა, დაველოდებით ოფიციალურ პასუხს მათგან. 16:00 საათამდე შეგვიძლია განვსაზღვროთ ამისთვის ვადა. შეთანხმების არსი მდგომარეობს იმაში, რომ ევროპული საქართველოს წარმომადგენლობა გაიზრდება სამი ადგილით - 9 ადგილამდე და ერთი ადგილი დაემატება პატრიოტთა ალიანსს. ეს უნდა მოხდეს ფრაქციების მიერ საკუთარი კვოტის არათვისების ხარჯზე. ერთი აუთვისებელი ადგილი იქნება ნაციონალური მოძრაობის მხრიდან. უმრავლესობის მხრიდან 2 ადგილი უნდა დარჩეს აუთვისებელი იმისთვის, რომ ეს შეთანხმება საბოლოოდ გაფორმდეს", - განმარტა პარლამენტის თავმჯდომარემ.

კობახიძის თქმით, კომისიის თავმჯდომარის კანდიდატურა და წევრთა კანდიდატურები წარმოდგენილი უნდა იყოს 16:00 საათამდე და შემდეგ განისაზღვრება დამატებითი ვადა საბოლოო შემადგენლობისთვის", - განაცხადა ირაკლი კობახიძემ.

6 ივნისის დღის წესრიგში 15 განსახილველი და 60-მდე კენჭსაყრელი საკითხია შეტანილი. ხვალ, 6 ივნისს ბიუროს სხდომა 12:45 წუთზე, ხოლო რიგგარეშე სხდომა 13:00 საათზე დაიწყება.