თეთრი ხმაურის მოძრაობის ლიდერის ბექა წიქარიშვილის განცხადებით, პარლამენტთან მიმდინარე პროტესტი პოლიტიკური ინტერესებისგან უნდა დაიცალოს. ამის შესახებ ბექა წიქარიშვილმა სოციალურ ქსელში დაწერა.

მისი თქმით, ზაზა სარალიძესთან სასწრაფოდ სალაპარაკო და ასახსნელი, რომ ტრაგედიებს ჩასაფრებული სვავების შემოკრებით პროტესტი შორს ვერ წავა.

"ისინი მხოლოდ შეჭამენ გულწრფელ ტკივილს და ნაცვლად საკუთარ ნაგავს დაყრიან. ყველა ადეკვატური მოქალაქის ვალდებულებაა ახლა ეს პროცესი კლოუნადისგან ვიხსნათ. გუშინ მთელი საღამო რუსთავი 2-ს ვუყურებდი და გული მისკდებოდა იმის ცქერით როგორ ილოკავენ ტუჩებს ჰუმანიზმს ამოფარებული სადისტები (დაქირავებულ ჭირისუფლად მოვლენილი არხის დირექტორის ჩათვლით). სასწრაფოდ დასაცლელია ეს პროტესტი ნაც-ქოცური ნარატივებისგან და წამოსაწევია მათი სამარცხვინო პოლიტიკით გამოწვეული საზოგადოებრივი წუხილები", - დაწერა ბექა წიქარიშვილმა.

ბექა წიქარიშვილი ფიქრობს, რომ ოცნება თავისი საკონსტიტუციო უმრავლესობით ფაქტობრივად უკვე დეფაქტოა.

"აქციების გაშავების კანტორის" ამუშავება მხოლოდ ადასტურებს ამას. არ ვიცი როგორ დასრულდება პროცესები, მაგრამ ბიძინა კი არა მსოფლიო ოლიგარქიაც ვეღარ იხსნის მათ. პოლიტიკური განაჩენი გუნდს გამოტანილი აქვს და დღეს თუ ხვალ აღსრულდება. პოლიტიკური ოპოზიციის არარსებობის ფონზე კი, პრაგმატული თვალსაზრისითაც და საჯარო ინტერესების გათვალისწინებითაც, სჯობს ეს ხვალ მოხდეს", - წერს წიქარიშვილი.

მისი აზრით, უმჯობესი იქნებოდა საგამოძიებო კომისია პოლიტიკურად დამოუკიდებელი პირებისგან დაკომპლექტებულიყო.

"სჯობდა დამოუკიდებელი საგამოძიებო ორგანო მოგვეთხოვა, გაიძვერა პოლიტიკოსების ნაცვლად მაღალი სანდოობის მქონე პირებისგან დაგვეკომპლექტებინა და თუ სისტემის დანაშაულებზე ვსაუბრობთ, ხორავას ტრაგედიასთან ერთად (რომელშიც ჩვენი, ეთიკურობისა და მორალურობისგან დაცლილი ქართული ოჯახებისა და საზოგადოების ბრალეულობაც უნდა ამოვიკითხოთ), უნდა მოვითხოვოთ ლევან აბზიანიძის, დემურ სტურუას, ამირან კვირიკაშვილის, პაატა პავლიაშვილის, თემირლან მაჩალიკაშვილის, ფენტანილგარეული ნივთიერებებით დახოცილი ახალგაზრდებისა და სხვა ტრაგიკული საქმეების ხელახალი, ღია და მიუკერძოებელი გამოძიება", - დაწერა ბექა წიქარიშვილმა.