ხორავას ქუჩაზე მოკლული დავით სარალიძის მკვლელობის მცდელობაში ბრალდებულის ადვოკატის კახა პაპავას განცხადებით, საქმეში საერთაშორისო ექსპერტების ჩართვით გამოძიება ცდილობს ახალ გარემოებებს გაუსვას ხაზი და სინამდვილეში ახალი არაფერი გამოიკვეთება.

ამის შესახებ ადვოკატმა ჟურნალისტებს იმ სასამართლო პროცესის დაწყებამდე განუცხადა, სადაც ხორავას ქუჩის საქმეზე დაკავებულების მსჯავრი უნდა გამოცხადდეს.

კახა პაპავას თქმით, მას უკვე დაუკავშირდნენ პროკურატურიდან და ხელახალი ექსპერტიზისთვის, საქმის მასალების გადაცემა სთხოვეს.

"ის ინსტიტუციები, რომლებიც მოწოდებულია, რომ დადგინდეს სიმართლე, არ არიან ეფექტურები და საჭირო გახდა საზღვარგარეთიდან მოწვეული ექსპერტების ჩართვა", - განაცხადა ადვოკატმა.

31 მაისს სასამართლომ ხორავას ქუჩის საქმეზე დასკვნა გამოაცხადა. ხორავას ქუჩაზე მოკლული ლევან დადუნაშვილის მკვლელობის საქმეზე თბილისის საქალაქო სასამართლომ გამამტყუნებელი განაჩენი გამოიტანა. რაც შეეხება მეორე მოკლულს, დავით სარალიძეს, მისი მკვლელობის საქმეზე მოსამართლემ ბრალი მკვლელობიდან მკვლელობის მცდელობაზე გადააკვალიფიცირა. შესაბამისად, ამ დროისათვის უცნობია, ვინ მოკლა არასრულწლოვანი დავით სარალიძე.

სასამართლოს გადაწყვეტილებას მრავალათასიანი საპროტესტო აქციები მოჰყვა. თავდაპირველად ზაზა სარალიძემ აქცია პროკურატურასთან მთავარი პროკურორის ირაკლი შოთაძის გადადგომის მოთხოვნით გამართა. მას შემდეგ, რაც მთავარი პროკურორი, ირაკლი შოთაძე გადადგა აქცია საქართველოს პარლამენტთან გადმოინაცვლა.

აქციაზე #ნუმომკლავ ითხოვენ ყველა იმ პირის დასჯას, რომლებიც, მათი აზრით, ხორავას ქუჩის საქმის ფალსიფიცირებაში მონაწილეობდნენ. დემონსტრანტებმა სხვა მოთხოვნებიც წამოაყენეს, მათ შორის მთავრობის გადადგომა.