რუსთავი 2-ის გენერალური დირექტორი, ნიკა გვარამია გადაცემა კვირის აქცენტებში, რომლის თანაწამყვანიცაა, ჟურნალისტ გიორგი გაბუნიას მიმართ გაკეთებულ კრიტიკულ განცხადებებს გამოეხმაურა.

მონოლოგამდე სტუდიაში შუქი ჩაქრა, რაც გვარამიამ იმით ახსნა, რომ სტუდიის მსგავსად საქართველოშიც "ბნელდება":

"ბნელდება არამხოლოდ საეკლესიო მოღვაწეების დამსახურებით, საქართველოში ბნელდება რუსეთის გამო. საქართველოს აბნელებენ რუსეთის ემისრები და საეკლესიო მწყევლელი მამაოები არიან რუსეთის ემისრები. ისინი ებრძვიან ქართულ ეკლესიას ძალიან დიდი ხანია".

გვარამია ყვებოდა თუ რა გავლენა იქონია რუსეთმა საქართველოს მართლმადიდებელი ეკლესიისა და მღვდელმსახურების ცხოვრებაში. გვარამიას განმარტებით, რუსთავი 2 როგორც საქართველოს იცავს რუსეთის შემოსევებისგან, ისე ქართულ ეკლესიას რუსული გავლენების მღვდელმსახურებისგან. მისივე თქმით, საქართველო უნდა გათავისუფლდეს რუსული აგენტურისგან.

"ამისთვის ჩვენ გვჭირდება გაწმენდა არამხოლოდ ეკლესიის, არამედ ქვეყნის. მისი გაწმენდა, პირველ რიგში, იმ ადამიანისგან [ბიძინა ივანიშვილი], რომელზეც ბევრი ისაუბრა მიხეილ სააკაშვილმა. მან თქვა, რომ რუსეთმა ვერ აიღო თბილისი, მაგრამ რუსეთმა აგვარჩევინა ბიძინა ივანიშვილი. მე არ მივიჩნევ ამ ფაქტს რუსეთისგან დამოუკიდებელ ფაქტად. საქართველოში თუ რამე ანათებს ამ ჭრაქივით [გვარამიამ მაგიდაზე ჭრაქი დადო] ეს კომპანიაც ანათებს. სანამ ეს კომპანია ანათებს, ის ყოველთვის ამხელს რუსულ აგენტურას, ნებისმიერ სტრუქტრურაში, სახელმწიფო სტრუქტურებშიც, საეკლესიო სტრუქტურებშიც, საზოგადოებრივ მოძრაობებშიც".