ევროპული საქართველო პროტესტი ნიშნად არ დაესწრება საკრებულოს სხდომას, სადაც ვარდების მოედნისთვის სახელის გადარქმევის საკითხზე უნდა იმსჯელონ.

საკრებულოს დეპუტატ გოკა გაბაშვილის თქმით, ეს არის ვიწროპარტიული, პოლიტიკური შურისძიება პოლიტიკურ ოპონენტზე და ისტორიის გადაწერის უნიჭო მცდელობა.

"თბილისის საკრებულოს დამოუკიდებლობის დღის აღნიშვნა კონფრონტაციული საკითხით გადაწყვიტა. იმის მაგივრად, რომ ხელისუფლება ზრუნავდეს საზოგადოების კონფრონტაციაზე, იმაზე, რომ ასეთ თარიღებზე საზოგადოების გამაერთიანებელი ინიციატივით გამოვიდეს, გამოაქვს საკითხი ვარდების რევოლუციისთვის სახელის გადარქმევაზე, რომელიც საზოგადოებისთვის მიუღებელია", - განაცხადა გოკა გაბაშვილმა საკრებულოს სხდომის დაწყებამდე. მისი თქმით, ეს არის კონკურენცია, როცა საქართველოს უახლესი ისტორიის ძალიან მნიშვნელოვან თარიღებს ხელისუფლება სხვა თარიღებს აჯიბრებს.

"ე.წ. ფერადი რევოლუციები აღიზიანებს ერთადერთ ქვეყანას და სამწუხაროა, რომ საქართველოს ხელისუფლება და ქართული ოცნება ბაძავს თავის დიდ მეგობარ რუსეთს, როცა ცდილობს საქართველოს უახლესი ისტორიიდან წაშალოს ვარდების რევოლუციის სახელი", - განაცხადა გოკა გაბაშვილმა.

"ვარდების მოედნისთვის" სახელის შეცვლის ინიციატივა სახელდების და სიმბოლიკის კომისიის თავმჯდომარემ თინათინ ნიბლოშვილმა წამოაყენა. ინიციატივის განხილვისთვის 20-დღიანი ვადა იყო განსაზღვრული.

თინათინ ნიბლოშვილი ჟურნალისტებთან საუბრისას ამბობდა, რომ "ვარდების რევოლუციის მოედანი" იგივე ნაციონალური მოძრაობის მოედანია.

ინიციატივას მხარი დაუჭირა თბილისის მერმა კახა კალაძემაც. მან ქალაქის მთავრობის სხდომაზე იმედი გამოთქვა, რომ ამ ინიციატივას საზოგადოებაც მხარს დაუჭერს.