საქართველოს ჟურნალისტური ეთიკის ქარტიის საბჭო მედიისა და გამოხატვის თავისუფლების წინააღმდეგ გადადგმულ ნაბიჯად აფასებს საქართველოს მართლმადიდებელი ეკლესიის მიერ გავრცელებულ განცხადებას. მართლამდიდებელი ეკლესია სამღვდელოებასა და ყელა მოქალაქეს რუსთავი 2-ის ბოიკოტისკენ მოუწოდებს.

საქართველოს ჟურნალისტური ეთიკის ქარტია ხელისუფლებას მიმართავს დაიცვას ჟურნალისტების უსაფრთხოება, დააფიქსიროს თავისი პოზიცია და მაგალითი მისცეს საზოგადოების სხვა ჯგუფებს ამ ტელეკომპანიასთან თანამშრომლობის გაგრძელებით.

"რაც არ უნდა კრიტიკულ და სხვა ჯგუფებისთვის მტკივნეულ თემაზე ამზადებდეს ჟურნალისტი გადაცემას, მისი გამოხატვის თავისუფლება დაცული უნდა იყოს. საპატრიარქოს მიერ მოწოდებული ბოიკოტი სწორედ ამ უფლების განხორციელებას უშლის ხელს, აგრესიის სამიზნედ აქცევს კონკრეტულ ჟურნალისტსა და ზოგადად მთელ მედიას", - ვკითხულობთ ქარტიის განცხადებაში.

ქარტიაში აცხადებენ, რომ საპატრიარქოს მიმართ, რომელიც ყოველწლიურად ბიუჯეტიდან მიღებულ ათეულობით მილიონ ლარს ხარჯავს, მაღალი საზოგადოებრივი ინტერესი არსებობს.

საპატრიარქომ რუსთავი 2-ის მიმართ ბოიკოტის გამოცხადების შესახებ განცხადება გიორგი გაბუნიას 22 მაისის გადაცემის შემდეგ გაავრცელა. "ცენზურის საფრთხზე" სასაუბროდ წამყვანს თვალსაჩინოებისთვის სტუდიაში მიტანილი ჰქონდა მხატვარ ლია უკლებას ნახატი "თვითმკვლელი ღვთისმშობელი", რომელსაც სათამაშო პისტოლეტი უჭირავს.