თბილისის მეტროს მემანქანე თბილისის მერს, კახა კალაძეს მეტროში არსებულ პრობლემებზე სასაუბროდ თავის სახლში ეპატიჟება. ამის შესახებ მან მეტროსადგურ რუსთაველთან გამართულ აქციაზე განაცხადა.

"მინდა ეს მიმართვა გავუგზავნო ქალაქის მერს. რა ხდება და რეალურად რა სიტუაციაა, უბრალოდ, მინდა დაწვრილებით აღვწერო და გადაწყვეტილებას თვითონ მიიღებს როგორ მოიქცევა. ეს არის უბრალო ჩემი გზავნილი ქალაქის მერთან", - თქვა მემანქანემ.

მეტროსადგურ რუსთაველთან მემანქანეთა სოლიდარობის აქცია დღეს, 22 მაისს, 19 საათზე დაიწყო. აქციაზე მივიდა რამდენიმე ათეული ადამიანი.

მემანქანეთა გაფიცვა

შპს თბილისის სატრანსპორტო კომპანიასთან კოლექტიური შრომითი დავა რამდენიმე თვეა მიმდინარეობს, რომლის ფარგლებში მიმდინარე მოლაპარაკებების წარუმატებლობის გამო, მეტროს თანამშრომლებმა კანონმდებლობით დადგენილი წესით 2018 წლის 3 მაისს გაფიცვა დააანონსეს, რომელიც თბილისის საქალაქო სასამართლოს მიერ 30 დღის ვადით 2018 წლის 3 ივნისამდე გადაიდო.

2018 წლის 21 მაისს თბილისის საქალაქო სასამართლომ, ამჯერად განუსაზღვრელი ვადით შეზღუდა პროფესიულ გაერთიანების წევრი მეტროს მემანქანეების გაფიცვაში მონაწილეობის მიღების უფლება "სამუშაო საათების განმავლობაში".