მთავარი პროკურატურა ხორავას ქუჩაზე მომხდარი მკვლელობის საქმეზე, რუსთავი 2-ის ეთერით გასულ სიუჟეტს ეხმაურება. საგამოძიებო ორგანო განმარტავს, რომ ნაჩვენები კადრები გამოძიების მტკიცებულებაა, რომელიც დაცვის მხარესთან გაცვალეს და წარდგენილია სასამართლოში. რუსთავი 2-ის ცნობით, დანაშაულის დაფარვაში ბრალდებულმა პრებმა ორი მეთორმეტე კლასელის მკვლელობის საქმის მტკიცებულებები გადაყარეს.

სიუჟეტში ნახსენებ ინფორმაციაზე, რომ პეკინის ქუჩაზე პროკურატურის ყოფილი მაღალჩინოსანი, მირზა სუბელიანი იმყოფებოდა, უწყება აცხადებს, რომ აღნიშნული გამოძიებისთვის სიახლე არ არის.

"საქმეზე ჩატარებული გამოძიებით დადგენილია, რომ ხსენებულ მისამართზე მირზა სუბელიანის მისვლის მიზანი არსებულ ვითარებაში გარკვევა, არასრულწლოვანი შვილის ნახვა და სამართალდამცავებთან თანამშრომლობა იყო", - ნათქვამია პროკურატურის განცხადებაში.

უწყება ასევე განმარტავს, რომ სუბელიანმა არასრულწლოვანი შვილი იმავე დღეს წარადგინა პოლიციაში და დაკითხვას დაესწრო.

რუსთავი 2-ის ცნობით, საქმის ერთ-ერთი ფიგურანტის - მიხეილ კალანდიას სახლთან არსებული სათვალთვალო კამერის ჩანაწერში ჩანს, რომ 51-ე სკოლის ორი მოსწავლის მკვლელობის შემდეგ, ჩხუბის მონაწილეებმა სისხლიანი ტანსაცმელი და სხვა მტკიცებულებები საკანალიზაციო ჭაში ჩაყარეს.

ამავე მედიასაშუალების ცნობით, კალანდიების სახლის ეზოში ფეხით შედის მირზა სუბელიანი, პროკურატურის ყოფილი მაღალჩინოსანი, რომელიც კალანდიების ოჯახის ნათესავია.

მირზა სუბელიანი აღარ არის საქართველოს პროკურატურის თანამშრომელი. ხორავას ქუჩაზე მომხდარი მკვლელობის შემდეგ, რამდენიმე დღეში მან განცხადებით მიმართა საქართველოს მთავარ პროკურორს.

მკვლელობა ხორავას ქუჩაზე

გამოძიების ცნობით, შემთხვევის ადგილიდან ამოღებულია დანაშაულის ჩადენის იარაღები - ორი დანა და სისხლიანი ტანსაცმელი.

დანაშაულის დაფარვის ბრალდებით სისხლის სამართლის პასუხისგებაში მისცეს 5 პირი. მათგან სამის მიმართ აღკვეთის ღონისძიების სახით გამოყენებულია პატიმრობა, კიდევ ერთს შეფარდებული აქვს გირაო, ხოლო მეხუთე არასრულწლოვანი მშობლის მეთვალყურეობის ქვეშაა. მკვლელობაში ბრალდებულის სახით ორი არასრულწლოვანია დაკავებული.

პირველ დეკემბერს, თბილისში, ხორავას ქუჩაზე არასრულწლოვნებს შორის ურთიერთშელაპარაკების შედეგად ორი მოზარდი მოკლეს.

ლევან დადუნაშვილი საავადმყოფოში მიყვანამდე გარდაიცვალა. დავით სარალიძეს საავადმყოფოში სამი ოპერაცია გაუკეთდა, თუმცა ის მომხდარიდან მეორე დღეს გარდაიცვალა.