ქართული ოცნების დეპუტატების განცხადებით, პარტიაში თანხმდებიან, რომ ნარკოპოლიტიკა უნდა იყოს ჰუმანური მომხმარებლების და მკაცრი ნარკორეალიზატორების მიმართ. დეპუტატების თქმით, გუნდში ვერ შეთანხმდნენ გაზრდის თუ არა დეკრიმინალიზაცია მომხმარებელთა რაოდენობას. ამის შესახებ მათ პარტიის შეხვედრის შემდეგ ისაუბრეს.

ჯანდაცვის კომიტეტის თავმჯდომარის, აკაკი ზოიძის განცხადებით, პარტიაში ვერ თანხმდებიან რა დროში და რა ფორმით მოხდება ცვლილებები ნარკოპოლიტიკაში:

"ვეცდებით დავარწმუნოთ ოპონენტები, რომ ასეთი ცვლილებების შედეგად არ მოხდება არანაირად ნარკოტიკების მომხმარებელთა რაოდენობის მატება თუ წახალისება, თუ ახალი მომხმარებლების გაჩენა. ოდენობასთან მიმართებაში ვიმსჯელებთ და არას თქმა ყოველთვის შეგვიძლია."

უმრავლესობის წევრმა, კარლო კოპალიანმა შეხვედრის შემდეგ განაცხადა, რომ დეკრიმინალიზაცია მხოლოდ მარიხუანას უნდა შეეხოს და სხვა ნარკოტიკის მოხმარებაზე სისხლის სამართლის პასუხისმგელობა უნდა დარჩეს. მისი თქმით, სხვა სახის ნარკოტიკების პირველ და მეორე მოხმარებაზე სისხლისსამართლებრივი სასჯელი არ უნდა იყოს. დეპუტატმა დასძინა, რომ თუ მომხმარებლებს "საშველი არ დაადგება" მაშინ უნდა დაისაჯოს.

უმრავლესობის წევრი, გიგა ბუკიაც ფიქრობს, რომ მძიმე ნარკოტიკის მოხმარება ისევ კრიმინალად უნდა დარჩეს, მაგრამ სასჯელის სახით ციხის ნაცვლად "ალტერნატიული მკურნალობა" უნდა იყოს გათვალისწინებული. ბუკია აცხადებს, რომ ნარკომომხარებლებს არ უნდა ჰქონდეთ მართვის მოწმობა, დეკრიმინალიზაციის შემთხვევაში კი ამ სასჯელს ვეღარ გამოიყენებენ.

ამავე პარტიის დეპუტატის, ლევან გოგიჩაიშვილის განცხადებით, ნარკომომხმარებელთან ჰუმანური მიდგომა ნიშნავს იმას, რომ ეს საკითხი ჯანდაცვის სფერო უნდა გახდეს. მისივე თქმით, გუნდში თანხმდებიან, რომ ნარკორეალიზატორების მიმართ "დევნის პოლიტიკა" უნდა გატარდეს.

9 მაისს საქარველოს პარლამენტის თავმჯდომარემ, ირაკლი კობახიძემ განაცხადა, რომ მმართველი გუნდის მთავარი ამოცანა ნარკოპოლიტიკაზე პოზიციების შეჯერება და კანონპროექტის მიღება.

თეთრი ხმაურის მოძრაობასა და შინაგან საქმეთა სამინისტროს შორის ნარკოპოლიტიკის რეფორმაზე მოლაპარაკებები გრძელდება. მოძრაობის წარამომადგენელის, ბექა წიქარიშვილის თქმით, მოძრაობა მოითხოვს პარლამენტში გაგრძელდეს იმ კანონპროექტის განხილვა, რომელიც ეროვნულმა პლატფორმამ დაარეგისტრირა და არა იუსტიციის სამინისტროს ვერსიის, რომელიც, მათი თქმით, მავნებლურია.