საქართველოს პარლამენტის დეპუტატები ანტიჰომოფობიური აქციის გაუქმებას არაერთგვაროვნად აფასებენ. დეპუტატების ნაწილი მიესალმება აქციის გაუქმებას, ნაწილი კი მიიჩნევს, რომ სახელმწიფო ლგბტ ჯგუფის წევრებს ვერ იცავს ძალადობისგან.

ქართული ოცნების წევრის, ზაქარია ქუცნაშვილის განცხადებით, ერთი დაპირისპირებული ჯგუფის აქტივობა მეორის წამახალისებელია და პირიქით. ის მიესალმება აქციების გაუქმებას და მიიჩნევს, რომ ეს გადაწყვეტილება პროვოცირების თავიდან აცილების მიზნით იყო მიღებული.

"როცა ერთიც და მეორეც [ჯგუფები] მოერიდა დაპირისპირებული ძალების პროვოცირებას, ეს უკვე ნიშნავს, რომ ქართული დემოკრატიის კულტურა იზრდება",- აცხადებს ქუცნაშვილი.

ამავე პარტიის წევრი, პარლამენტის ევროინტეგრაციის კომიტეტის თავმჯდომარე, თამარ ხულორდავასა ამბობს, რომ შსს-მ და სახელმწიფომ ყველაფერი გააკეთა იმისთვის, რომ აქციების დროს ადამიანების უსაფრთხოება დაცული ყოფილიყო.

"იმ შემთხვევაშიც, თუკი დღეს დადგებოდა დღის წესრიგში ასეთი აქციის ჩატარება, გაკეთდებოდა ყველაფერი იმისთვის, რომ ძალადობა არ ყოფილიყო დაშვებული", - ამბობს ხულორდავა.

საკითხის მიმართ განსხვავებული დამოკიდებულებაა ნაციონალურ მოძრაობაში. პარტიის წევრი, რომან გოცირიძე მიიჩნევს, რომ მთავრობის განცხადება ნებისმიერი ჯგუფის ძალადობისგან დაცვის შესახებ დაცინვაა.

"ის, რომ პოლიციის კორდონით იქნება მოძალადეებისგან დაცული მეორე მხარე, არაფერს ნიშნავს",- აცხადებს დეპუტატი.

ევროპული საქართველოს წარმომადგენელი, ოთარ კახიძე კი ამბობს, რომ ლგბტ საზოგადოებას არ აქვს განცდა, რომ მათი უსაფრთხოება დაცული იქნება და შსს ვალდებულია, მათი უფლებების სრულფასოვანი რეალიზაცია უზრუნველყოს.

თანასწორობის მოძრაობამ გუშინ, 16 მაისს, დაანონსებული აქცია გააუქმა. მოძრაობაში აცხადებდნენ, რომ მიზეზი აქციაზე მყოფთა უსაფრთხოება იყო. მოგვიანებით, ქართულმა მარშმაც უარი თქვა მსვლელობაზე. სანდრო ბრეგაძის თქმით, გადაწყვეტილება მას შემდეგ მიიღეს, რაც გაიგეს, რომ თანასწორობის მოძრაობის დაანონსებული აქცია აღარ გაიმართებოდა.