EKhokavkaza-ს ინფორმაციით, ერევანში იქ, სადაც შეიარაღებული დაჯგუფება პოლიციის შენობაში უკვე მესამე დღეა გამაგრებულია, გასულმა ღამემ ინციდენტების გარეშე ჩაიარა. ამ დროისთვის პოლიციის შენობის მიმდებარედ ჟირაირა სეფილიანის მხარდამჭერები ისევ არიან შეკრებილები და განმარტავენ, რომ არ სურთ, პოლიციის მიერ დაგეგმილმა სპეცოპერაციამ სისხლისღვრა გამოიწვიოს.

ერევანში მყოფი ქრონიკის ჟურნალისტის ინფორმაციით კი, ამ დროისთვის არ არის გამორიცხული, რომ პოლიციის შენობაზე, სადაც თავდამსხმელები ამ დრომდე იმყოფებიან, შტურმი განხორციელდეს. მისი თქმით, 200-მდე დემონსტრანტი შენობის მიმდებარედ მთელი ღამის განმავლობაში იყო შეკრებილი და როგორც თავად ამბობდნენ, აქციას ჟირაირა სეფილიანისა და მისი დაჯგუფების მხარდასაჭერად მართავდნენ.

ქართველმა ჟურნალისტმა ასევე შეძლო ტელეფონით დაკავშირებოდა ერთ-ერთ შეიარაღებულ თავდამსხმელს, რომელიც აცხადებს, რომ თავდასხმა ისევ გაგრძელდება, ხოლო ის და მისი გუნდის წევრები რაიმე პირობებზე დათანხმებას არ აპირებენ:

"ეს ბაზა ჩვენი კონტროლის ქვეშაა. მოქალაქეები ცდილობენ ჩვენამდე მოსვლას, მაგრამ პოლიციის კორდონს ვერ ცდებიან. ისინი ჩვენგან დაახლოებით ერთ კილომეტრში არიან. ჩვენი უპირველესი მოთხოვნაა, რესპუბლიკის ძირეული შეცვლა. მანამდე არ დავთმობთ პოზიციებს, სანამ სისტემური ცვლილებები არ განხორციელდება როგორც შიდა, ისე გარე პოლიტიკაში. მოცემულ სიტუაციაში ხალხმა უნდა თქვას თავისი სიტყვა, წინააღმდეგ შემთხვევაში ჩვენი მოთხოვნები უბრალო მოთხოვნებად დარჩება".

2 დღის წინ ერევანში, ერებუნის რაიონში, შეიარაღებული დაჯგუფება სატვირთო მანქანებით პოლიციის ტერიტორიაზე შეიჭრა და შენობის აღება სცადა, რის შედეგადაც ერთი პოლიციელი გარდაიცვალა, 3 კი დაშავდა. მათ ასევე აიყვანეს მძევლები, რომელთაგან მოგვიანებით რამდენიმე გაათავისუფლეს.

ამბოხებულების მთავარ მოთხოვნას სომხეთის ოპოზიციური სამოქალაქო ინიციატივის - დამფუძნებელი პარლამენტის კოორდინატორის, ჟირაირა სეფილიანის გათავისუფლებაა, რომელიც იარაღის უკანონო შეძენა-შენახვისათვის არის ბრალდებული. ამასთანავე, თავდამსხმელები ითხოვენ, გადადგეს ქვეყნის პრეზიდენტი და ძალაუფლება ხალხს გადაეცეს.

გამოძიების ინფორმაციით, სეფილიანი შეიარაღებულ დაჯგუფებასთან ერთად აპირებდა შენობების, ტელეკომუნიკაციების, მათ შორის ერევნის სატელევიზიო ანძის დაკავებას.

მათივე ცნობით, დანაშაულებრივი ჯგუფი გეგმავდა ყარაბაღის კონფლიქტის ზონაში ვითარების ესკალაციას პროვოკაციების გზით.