ნაჯახით შეიარაღებული პირი, რომელიც სამხრეთ გერმანიის ქალაქ ვურცბურგში მატარებელში შეიჭრა და მგზავრებს დაზიანება მიაყენა, წარმოშობით ავღანელი ლტოლვილი იყო.

ბავარიის შინაგან საქმეთა მინისტრის თქმით, თავდამსხმელი შემთხვევის ადგილიდან გაქცევას ცდილობდა, როდესაც პოლიციელებმა ესროლეს და მოკლეს.

როგორც Deutsche Welle წერს, შს მინისტრმა სატელევიზიო ინტერვიუში დაადასტურა ფაქტი, რომ თავდამსხმელი ოქსენფურტში ჩაჯდა მატარებელში. ამავე ქალაქში იგი გერმანულ ოჯახთან ერთად ცხოვრობდა, მას შემდეგ რაც ავღანეთიდან მეურვის გარეშე ჩამოვიდა და თავშესაფრის მაძიებელი გახდა. მისივე თქმით, იგი დაახლოებით 17 წლის იქნებოდა.

18 ივლისს, ადგილობრივი დროით 21:15 საათზე, დანითა და ნაჯახით შეიარაღებული პირი გერმანიის ქალაქ ვურცბურგში მატარებელში შეიჭრა და რამდენიმე ადამიანს სერიოზული დაზიანებები მიაყენა. ამ დროისთვის ცნობილია, რომ დაშავებულია 4 მგზავრი. როგორც შს მინისტრი აცხადებს, მათ შორის სამი კრიტიკულ მდგომარეობაშია, ერთმა კი მსუბუქი დაზიანება მიიღო.

თავდასხმის მოტივი უცნობია. ჯერჯერობით არ ვრცელდება ინფორმაცია იმის შესახებ, იყო თუ არა აღნიშნული შემთხვევა ტერორისტული აქტი.

თავდაპირველად, ინფორმაცია ვრცელდებოდა 20-მდე დაშავებულის შესახებ, თუმცა როგორც მოგვიანებით გაირკვა, 14 მგზავრს ექიმთა დახმარება ფსიქოლოგიური შოკის გამო დასჭირდა და ისინი დაჭრილები არ ყოფილან.