გირჩის ლიდერი ზურა ჯაფარიძე არ აპირებს გადაიხადოს ის 2000 ლარი, რომელიც სასამართლომ 3 მაისს წვრილმანი ხულიგნობისა და პოლიციის მიმართ წინააღმდეგობის გაწევის მოტივით დააკისრა.

ზურა ჯაფარიძის განცხადებით, მას კანონი არ დაურღვევია და სასამართლოში შვიდმა პოლიციელმა მოიტყუა, როცა თქვა, რომ ზურა ჯაფარიძე მათ აგინებდა და ფიზიკურ წინააღმდეგობას უწევდა.

"მე არ ვაპირებ ამ 2000 ლარის გადახდას, შესაბამისად, სახელმწიფოს ჩემგან ძალით მოუწევს ამოიღოს 2000 ლარი", - განაცხადა ზურა ჯაფარიძემ ვიდეომიმართვაში, რომელიც რამდენიმე წუთის წინ გაავრცელა.

მისი თქმით, აპირებს გაასუფთავოს საკუთარი ბანკის ანგარიში, რომლიდანაც სახელმწიფო ვერაფრის წაღებას ვერ მოახერხებს.

"სასამართლოს დარჩება ერთი გზა, გაყიდოს ბინა, რომელიც მდებარეობს ყიფშიძეზე და ცხოვრობენ ჩემი მოხუცი მშობლები. მე გარანტიას ვაძლევ სახელმწიფოს, რომ ვერ გაყიდიან ბინას და ჩემს მშობლებს ვერ გამოყრიან", - ამბობს ზურა ჯაფარიძე.

გირჩის ლიდერის განცხადებით, სასამართლოს თანხის ამოღების სხვა გზა არ დარჩება.

ზურა ჯაფარიძის თქმით, ყველაფერს გააკეთებს იმისთვის, რათა დაისაჯონ სისტემის შიგნით პოლიციელები, რომელთა ცრუ ჩვენებების გამოც ადამიანებს იჭერენ და ასამართლებენ.

"სისტემის შიგნით არავინ დასჯილა. სისტემა ამ ადამიანებს ჩაგრავს და ასე ხდება ბევრ გახმაურებულ საქმესთან დაკავშირებით და შეგიძლიათ წარმოიდგინოთ, რა ხდება გაუხმაურებელ დანაშაულებებზე. სისტემას შეუძლია ორი პოლიციელი მოიყვანოს, რომელიც ზღაპრებს მოყვება და სისტემა ამ ადამიანებს, რასაც უნდა იმას იზამს", - განაცხადა ზურა ჯაფარიძემ.

ის ამბობს, მისი მიზანი რიგითი პოლიციელების დასჯა არ არის.

"ჩემი მიზანია დაისაჯოს ის ადამიანები, ვინც ამ გადაწყვეტილებას მიიღებს. ამ სისტემას დედას მოვუტყნავ, ამ ქვეყანაში პოლიციელების ჩვენებით ვერავის დაჩაგრავენ", - განაცხადა ზურა ჯაფარიძემ.