რას ნიშნავს აიისაზე მიღებული სასამართლოს გადაწყვეტილება

თბილისის საქალაქო სასმართოლოს გადაწყვეტილება, რომელმაც პრეზერვატივ აიისას შეფუთვა რელიგიური გრძნობების შემლახავად მიიჩნია პოლიტიკოსები არაერთგვაროვნად აფასებენ. ზოგი სასმართლოს გადაწყვეტილებას ეთანხმება და მიაჩნია, რომ ორთითზეწამოცმული პრეზერვატივით რელიგიური გრძნობები ილახება, ზოგი კი, გადაწყვეტილებას უკანგადადგმულ ნაბიჯად აფასებს.

ქართული ოცნება

ქართული ოცნების დეპუტატის, გედევან ფოფხაძის განცხადებით, გამოხატვის თავისუფლება აბსოლუტური უფლება არ არის.

"არ შეიძლება შენ ვიღაც არ მოგწონდეს, მიგაჩნდეს, რომ კომერციულად მომგებიანია მისი დამამცირებელი ფორმით გამოხატვა, ამის უფლება არავისაქვს. მე რომ ავდგე და იმ კომერციული სტრუქტურის დირექტორის დედა დავახატო, მოეწონება ასეთი რაღაც? არ ჩათვლის რომ ეს ცუდია? ზღვარი სად არის? თუ წმინდანია, თუ ჩემთვის ღირებულია ან მიყვარს არ მინდა შემაწუხებელი ფორმით სადღახ იყოს გამოხატული", - განუცხადა On.ge-ს გედევან ფოფხაძემ.

მისი თქმით, არსად წერია, რომ გამოხატვის თავისუფლება სხვის გრძნობებს უნდა შეურაცხყოფდეს.

"მაშინ დედა ვაგინოთ ერთმანეთს და ვუწოდოთ ამას გამოხატვის თავისუფლება. ხო არ შეიძლება ასე?" - გედი ფოფხაძე.

ევროპული საქართველო

ევროპული საქართველოს წევრის, გიორგი ტუღუშის განცხადებით, სასამართლომ საზიანო გადაწყვეტილება მიიღო და გამოხატვის თავისუფლების აშკარა შეზღუდვას მხარი დაუჭირა.

"გარდა იმისა, რომ ეს გადაწყვეტილება ევროპის ადამიანის უფლებათა სასამართლოს პრაქტიკასთან აშკარა წინააღმდეგობაშია, ასევე ჩვენს საკონსტიტუციო სასამართლოს ძალიან კარგად აქვს განმარტებული გამოხატვის თავისუფლების მუხლი. ზოგადად, ეს გადაწყვეტილება პირდაპირ ეხმაურება იმ პროცესებს, რომელიც საქართველოში გვაქვს", - განაცხადა გიორგი ტუღუშმა.

მისი თქმით, ბოლო რამდენიმე წელია პარლამენტში იმ კანონპროექტების ინიცირების მცდელობაა, რომელიც გამოხატვის თავისუფლებაში უხეშ ჩარევას გულისხმობს.

გიორგი ტუღუშმა On.ge-ს უთხრა, რომ დაინტერესებულია, არის თუ არა საქმის კურსში თბილისის მერი, იმის შესახებ რასაც ზედამხედველობის სამსახურის იურიდიული განყოფილება აკეთებს.

"აქ ყველაზე ტრაგიკული არის ის, რომ ზედამხედველობის სამსახურის უმეცრებას სასამართლომ მხარი დაუჭირა. იმედი მაქვს, სააპელაციო სასამართლო მიხვდება, რასთან გვაქვს საქმე და შეეცდება, ეს მძიმე შეცდომა გამოასწოროს", - განაცხადა გიორგი ტუღუშმა.

ის ფიქრობს, რომ ეს საკითხი უნდა განიხილოს როგორც საკონსტიტუციო სასამართლომ, ასევე თუ საჭიროება იქნება, ადამიანის უფლებათა ევროპულმა სასამართლომაც.

პარტიოტთა ალიანსი

პატრიოტთა ალიანსის დეპუტატს, ადა მარშანიას მიაჩნია, რომ სასამართლო, გადაწყვეტილების მიღების პროცესში, უფრო მკაცრი უნდა ყოფილიყო.

"მე მიმაჩნია, რომ სასამართლომ ძალიან რბილი განაჩენი გამოიტანა. იმედია, გაასაჩივრებენ. საქმე ეხება რელიგიური გრძნობების შეურაცხყოფას. ჩვენი სახელოვანი მეფე თამარი ამავდროულად წმინდანადაც არის შერაცხული.აქედან გამომდინარე მიმაჩნია, რომ რბილი განაჩენია", - განაცხადა ადა მარშანიამ.

On.ge-ს კითხვაზე, არის თუ არა სასამართლოს გადაწყვეტილება გამოხატვის თავისუფლების შეზღუდვა, ადა მარშანია პასუხობს: "გამოხატვის თავისუფლება შეურაცხყოფას არ ნიშნავს. ჩვენ ეს ხშირად გვეშლება. გამოხატვის თავისუფლება ერთია და შეურაცხყოფაა მეორე, სხვადასხვა ცნებებია".

რესპუბლიკური პარტია

რესპუბლიკური პარტიის პოლიტსაბჭოს მდივანი, თამარ კორძაია აიისას შესახებ სასამართლო გადაწყვეტილებას უკან გადადგმულ ნაბიჯად აფასებს.

"ერთი ნაბიჯი რელიგიური შეუწყნარებლობის დაწყებამდე. ასეთი გადაწყვეტილება საზოგადოებაში დაპირისპირებას გააღვივებს და ამაზე პასუხისმგებელი პერსონალურად ის მოსამართლე იქნება, რომელმაც ხელი მოაწერა. ეს არის თითოეული ჩვენგანისა და მომავალი თაობების მიმართ უპასუხისმგებლობა. შევარდნაძის სასამართლოსაც არ მიუღია მსგავსი გადაწყვეტილება", - ამბობს კორძაია.

მისი თქმით, როცა საჩივრის ავტორები ვერ ასაბუთებენ, რატომ შეილახა მათი რელიგიური გრძნობები, ესაა აბსურდული რელიგიური მორალი.

"ეს არის ბოროტება, ძალადობა საზოგადოებაზე რელიგიური მორალის სახელით", - ამბობს კორძაია.

On.ge ნაციონალური მოძრაობისგანაც შეეცადა პოზიციის მოსმენას, თუმცა ისინი ამ საკითხთან დაკავშირებით კომენტარს ჯერ არ აკეთებენ.

ამავე თემაზე:

ბოლო ამბები:

გირჩევთ

რას ნიშნავს აიისაზე მიღებული სასამართლოს გადაწყვეტილება - პოლიტიკოსების შეფასებები