სულ მალე, კანადა დიდი შვიდეულის ერთადერთი წევრი ქვეყანა გახდება, სადაც მარიხუანა სრულად ლეგალიზებული გახდება. ამის პარალელურად, კანადის ლიბერალური პარტია, რომელსაც ქვეყნის პრემიერი ჯასტინ ტრუდო ხელმძღვანელობს, ყველა სახის ნარკოტიკის დეკრიმინალიზაციას აპირებს.

საკითხი ჯერჯერობით ოფიციალურად არ დგას პარტიის დღის წესრიგში. ლიბერალური პარტიის ყრილობაზე, რომელიც ჰალიფაქსში გაიმართება, პარტიის წევრები კენჭს უყრიან ამ იდეას. იმ შემთხვევაში, თუ რეზოლუცია პარტიის წევრთა უმრავლესობას მოეწონება, მისი ლობირება ოფიციალურად დაიწყება.

აღსანიშნავია, რომ კანადის ლიბერალურ პარტიას, კანონის მიღებისკენ, კონკურენტებიც მოუწოდებენ. ყველა სახის ნარკოტიკული საშუალების დეკრიმინალიზაცია დღის წესრიგში მას შემდეგ დადგა, რაც სინთეტიკური ნარკოტიკების მოხმარებამ სავალალო მაჩვენებლს მიაღწია. ე.წ ოპიოიდების ეპიდემიამ გასულ წელს 4 000 ადამიანის სიცოცხლე იმსხვერპლა და მათი მაჩვენებელი სწრაფად იზრდება.

კანადის დასავლურ პროვინციაში საქმე კიდევ უფრო უარესადაა. პროვინციამ ოპიოიდის კრიზისი 2016 წელს გამოაცხადა, თუმცა დღემდე, დღეში საშუალოდ ოთხი ადამიანი ზედოზირებისგან იღუპება.

მიუხედავად იმისა, რომ ფედერალურმა მთავრობამ არაერთი ღონისძიება გაატარა, კრიზისული მდგომარეობა მაინც უცვლელია. 2018 წლის დასაწყისში კანადის დემოკრატიულმა პარტიამ ყველა აკრძალული ნარკოტიკის დეკრიმინალიზაციის იდეაზე დაიწყო საუბარი. მოგვიანებით, ქალაქ ვანკუვერის მთარვობამაც მოუწოდა ფედერალურ ხელისუფლებას, რომ სასწრაფოდ მიიღონ ნარკოტიკების დეკრიმინალიზაციის გადაწყვეტილება.

"ნარკოტიკების აკრძალვამ და მომხმარებლების ციხეში გაშვებამ, მათთვის მკურნალობის ნაცვლად, შავი ბაზრის განვითარება გამოიწვია. ჩვენ მათთან ბრძოლაში ვხარჯავდით უზამრაზარ რესურსს და იმ ადამიანების მარგინალიზებას ვახდენდით, რომლებიც დახმარებას საჭიროებდნენ", - ამბობს ლიბერალური პარტიის წევრი ნათანიელ სმიტი.

იმ შემთხვევაში, თუ ლიბერალური პარტია დაეთანხმება კანონის შინაარს, ყველა ნარკოტიკის დეკრიმინალიზაციას ქვეყნის სამი ძირითადი პარტიიდან, ორი მხარს დაუჭერს. ამის მიუხედავად, არ არსებობს არანაირი გარანტია, რომ 2019 წლის არჩევნებში ჯასტინ ტრუდო თავის საარჩევო კამპანიაში აღნიშნულ ინიციატივას შეიტანს. ამის მიზეზი მისი წარსულში გავრცელებული განცხადებებია. ჯასტინ ტრუდო ამბობდა, რომ მისი მთავრობა არ გეგმავს არც ერთი სხვა ნარკოტიკის ლეგალიზებას, მარიხუანას გარდა.

ლიბერალური პარტიის წევრი ნათანიელ სმიტი ამბობს, რომ ლეგალიზებასა და დეკრიმინალიზაციას შორის განსხვავების დანახვა აუცილებელია. მისი თქმით, ისინი არ აპირებენ ნარკოტიკების გაყიდვასა და წარმოებაზე მუხლების შემსუბუქებას. დეკრიმინალიზაცია შეეხებათ მხოლოდ მომხმარებლებს და მათ სასჯელის ნაცვლად, მკურნალობას შესთავაზებენ.

ლიბერალურ პარტიას სჯერა, რომ მსგავსი მიდგომა პრობლემის მოსაგვარებლად საუკეთესო გზაა. სტატისტიკა მოწმობს, რომ ლიბერალურ მიდგომას დადებითი ტენდენციები ახასიათებს. ამის მაგალითია პორტუგალია, რომელსაც ყველა ნარკოტიკის დეკრიმინალიზაციამდე ნარკომომხმარებლების სავალალო მაჩვენებელი ჰქონდა. ნარკოპოლიტიკის ლიბერალიზაციის შემდეგ, პორტუგალიაში ზედოზირებით სიკვდილიანობის მაჩვენებელი მინიმუმამდე შემცირდა. ამასთან, გაიზარდა ნარკოტიკებზე დამოკიდებული ადამიანების მიმართვიანობა სამკურნალო დაწესებულებების მიმართ.

კანონის წინააღმდეგია კანადის კონსერვატიული პარტია და ისინი საკუთარი პოზიციების დაცვას აპირებენ.

კანადაში მარიხუანის ლეგალიზაციის შემდეგ, ბოლო ერთი წლის განმავლობაში, კანადელებმა მარიხუანას შეძენაში 5,7 მილიარდ კანადურ დოლარზე მეტი დახარჯეს.