ერევანში დღეს, 17 აპრილს, დილიდან ოპოზიციური მოძრაობის ასობით აქტივისტმა ქუჩების გადაკეტვა ისევ დაიწყო. დემონსტრანტები ყოფილი პრეზიდენტის, სერჟ სარგსიანის პრემიერ-მინისტრობის კანდიდატურას აპროტესტებენ. ინფორმაციას რადიო თავისუფლების ადგილობრივი ბიურო ავრცელებს.

ოპოზიციის მომხრეებმა გზების გადასაკეტად სკამები და ნაგვის ურნები გამოიყენეს.

ფოტო: Photolur

დილით ერევნის პოლიციის უფროსმა წერილობითი განმარტება გადასცა ოპოზიციონერ ლიდერ ნიკოლ პაშინიანს იმის თაობაზე, რომ 16 აპრილის მოვლენების გამო, პოლიციამ დემონტრაციის დაშლა გადაწყვიტა. პაშინიანმა დოკუმენტი წაუკითხავად დახია.

მან, ასევე, მოუწოდა მოქალაქეებს, რომ გააგრძელონ აქციები, რათა პარლამენტმა სარგსიანის პრემიერ-მინისტრად არჩევა ვერ შეძლოს. კერძოდ კი, მან პარლამენტის შენობის ყველა შესასვლელის გადაკეტვისკენ მოუწოდა.

გუშინ, 16 აპრილს პოლიციამ პარლამენტის შენობასთან არ მიუშვა აქციის მონაწილეები, რასაც დაპირისპირება მოჰყვა და 40-ზე მეტი ადამიანი დაშავდა, მათ შორის, პოლიციელები.