ლოს-ანჯელესელი მოსამართლის გადაწყვეტილებით, კალიფორნიის მაშტაბით სტარბაქსის მიერ წარმოებულ ყველა ყავას უნდა ჰქონდეს წარწერა, რომელიც მომხმარებლებს კიბოს გამოწვევის რისკზე გააფრთხილებს. ინფორმაციას Reuters ავრცელებს.

სტარბაქსს და კიდევ რამდენიმე ყავის მწარმოებელ კომპანიას ლოს ანჯელესში მოქმედმა საზოგადოებრივმა ჯგუფმა უჩივლა. ყავის კომპანიები დაადანაშაულეს პროდუქციაში ისეთი ქიმიკატების გამოყენებაში, რომელიც კალიფორნიის კანონმდებლობის მიხედვით კიბოს გამომწვევად მიიჩნევა.

ლოს-ანჯელესის უმაღლესი სასამართლოს მოსამართლის ელაიჰუ ბერლის ოთხშაბათს, 28 მარტს მიღებულ გადაწყვეტილებაში წერია, რომ სტარბაქსმა და სხვა კომპანიებმა ვერ წარადგინეს საკმარისი მტკიცებულებები ბრალდების უარსაყოფად.

სტარბაქსს სასამართლოს გადაწყვეტილების გასაჩივრების ვადა 10 აპრილამდე აქვს. კომპანიას ამ დრომდე კომენტარი არ გაუვრცელებია.