მესტიაში, ნენსკრა ჰესის ადმინისტრაციის შენობაში ადგილობრივი ცეცხლსასროლი იარაღით შეიჭრა და ჰაერში გაისროლა. ამ დროისთვის ადგილზე სამუშაოები შეჩერებულია და ჩაკეტილია ტერიტორია. შემთხვევა გუშინ საღამოს, 25 მარტს მოხდა.

შინაგან საქმეთა სამინისტროს განცხადებით, სამართალდამცავებმა აღნიშნულ საქმეზე 1990 წელს დაბადებული პირი, ძალადობით სხვისი მფლობელობის ხელშეუხებლობის დარღვევის ბრალდებით დააკავეს. დანაშაული 4-დან 6 წლამდე ვადით თავისუფლების აღკვეთას ითვალისწინებს.

შსს-ს ცნობით, დაკავებული ალკოჰოლის ზემოქმედების ქვეშ იყო, როდესაც ჭუბერში, იტალიური კომპანია "სალინი იმპრეჯილოს" ტერიტორიაზე ავტომანქანით შეიჭრა, ავტომატური ცეცხლსასროლი იარაღიდან ჰაერში გაისროლა და მიიმალა.

სამართალდამცველებმა ის მომხდარიდან რამდენიმე საათში დააკავეს. უწყების ცნობით, პოლიციამ დანაშაულის ჩადენის იარაღი - ავტომატური ცეცხლსასროლი იარაღი ნივთმტკიცებად ამოიღო.

გამოძიება მიმდინარეობს ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების და ძალადობით ბინაში ან სხვა მფლობელობაში მფლობელის ნების საწინააღმდეგოდ უკანონოდ შესვლის ან სხვა ქმედების ფაქტზე.