საქართველოს ახალგაზრდა იურისტთა ასოციაციაში აცხადებენ, რომ დაუშვებელია კომუნიკაციების კომისიის თავმჯდომარისა საზოგადოებრივი მაუწყებლის გენერალური დირექტორის მონაწილეობა სამეურვეო საბჭოს შესარჩევ კონკურსში. საიამ განცხადება რუსთავი 2-ში გასული სიუჟეტის შემდეგ გაავცელა.

ორგანიზაციაში ამბობენ, რომ კომუნიკაციების ეროვნული კომისია მაუწყებლობის სფეროში საქმიანობის მარეგულირებელი ორგანოა და მის ხელმძღვანელის, კახა ბექაურის სამეურვეო საბჭოს წევრის შესარჩევ კონკურსში ჩართულობა დაუშვებელია.

მათივე თქმით, მაუწყებლობის შესახებ კანონით, დაუშვებელია საზოგადოებრივი მაუწყებლის გენერალური დირექტორის მხრიდან ამ პროცესებში ჩართვა, რადგან მას ნიშნავს სამეურვეო საბჭო და ანგარიშვალდებულია მის წინაშე.

"მიგვაჩნია, რომ საზოგადოებრივი მაუწყებლის შემდგომი ფუნქციონირებისთვის აუცილებელია სამეურვეო საბჭოს წევრთა შერჩევის პროცედურა წარიმართოს სწორად და გამჭვირვალედ. საია მოუწოდებს ყველა პირს იმოქმედოს საქართველოს კანონმდებლობის შესაბამისად", - წერია საია-ს განცხადებაში.

რუსთავი 2-ის სიუჟეტში ევროპული საქართველოს წევრი ამბობს, რომ საზოგადოებრივი მაუწყებლის, ქართული ოცნების PR-სა და კომუნიკაციების კომისიის ხელმძღვანელები და პოსტ ტვ-ის დამფუძნებელი მაუწყებლის სამეურვეო საბჭოში ზაზა შათირიშვილის გაყვანაზე საუბრობდნენ.