ჩრდილოეთ კორეის ყოფილი და მოქმედი ლიდერები, კიმ ჩენ ინი და მისი მამა, კიმ ჩენ ირი ევროპული ვიზების მისაღებად ყალბ პასპორტებს იყენებდნენ. ამის შესახებ ინფორმაციას Reuters ავრცელებს. ეს ინფორმაცია ბრიტანულ მედიას დასავლეთ ევროპის ხუთი ქვეყნის უსაფრთხოების სამსახურის თანამშრომლებმა აცნობეს.

იმის დასამტკიცებლად, რომ ჩრდილოეთ კორეის მმართველი ოჯახის წევრები მართლაც ცდილობდნენ გაყალბებული პასპორტებით ევროპის ვიზების მიღებას, ბრაზილიური პასპორტების ასლებიც ვრცელდება. კიმ ჩენ ინისა და კიმ ჩენ ირის ყალბი პასპორტები, სულ მცირე, ორი ევროპული ქვეყნის ვიზის მისაღებად იყო წარდგენილი, თუმცა უცნობია, მოახერხეს თუ არა მათ ამ პასპორტებით ევროპაში მოგზაურობა.

ფოტო: Reuters

"ისინი იყენებდნენ ბრაზილიურ პასპორტებს, რათა ევროპული ვიზები მიეღოთ და ამას ეს ფოტოებიც ადასტურებს" - ანონიმურად განაცხადა ერთ-ერთი ევროპული ქვეყნის უსაფრთხოების სამსახურის თანამშრომელმა.

ჩრდილოეთ კორეის საელჩომ ბრაზილიაში ამ საკითხზე კომენტარის გაკეთება არ ისურვა. ბრაზილიის საგარეო საქმეთა სამინისტროს განცხადებით კი, ამ საკითხზე გამოძიება მიმდინარეობს.

ჩრდილოეთ კორეის ამჟამინდელი ლიდერი და მისი მამა გაყალბებულ პასპორტებში, ევროპული ვიზების მისაღებად, იოზეფ პუაგისა და იჯონგ ჩოისის სახელს იყენებდნენ.

სავარაუდოდ, ამ პასპორტებს ჩრდილოეთ კორეის მოქმედი და ყოფილი ლიდერები ბრაზილიაში, იაპონიასა და ჰონგ კონგში სამოგზაუროდაც იყენებდნენ.