ნაციონალური მოძრაობის წევრი, ლევან ხაბეიშვილი ამბობს, რომ კახა კალაძემ ევროპულ საქართველოსთან თანამშრომლობის შესახებ ნათქვამი გასაკვირი არ იყო, რადგან ქართული ოცნების თამაშს თამაშობენ. კალაძემ ნაციონალურ მოძრაობას მარგინალური ძალა უწოდა და აღნიშნა, რომ ევროპულ საქართველოსთან თანამშრომლობს.

"კალაძემ ამით დეკლარირება მოახდინა, პრინციპში ახალი არაფერი უთქვამს", - უთხრა ხაბეიშვილმა რუსთავი 2-ს.

მისივე თქმით, კალაძემ ნაციონალური მოძრაობისთვის მარგინალების წოდებით პარტიის ნახევარ მილიონიან ამომრჩევლებს უწოდა იგივე.

კალაძის განცხადებას შეცდომა უწოდა ევროპული საქართველოს ლიდერმა, ელენე ხოშტარიამ. მისი თქმით, ხელისუფლების ვალდებულებაა ესაუბროს იმ ოპოზიციასაც, რომელიც მათ არ მოსწონთ.

"სამწუხაროდ, ამ განცხადებით გამოჩნდა, რომ კახა კალაძეც უშვებს ტრადიციულ, ძალიან ფუნდამენტურ შეცდომას მსგავსად [ბიძინა] ივანიშვილისა და ქართული ოცნებისა. მიაჩნიათ, რომ ოპოზიციას განსაზღვრავს ხელისუფლება. ოპოზიციას განსაზღვრავს ხალხი და მოსწონს თუ არა ეს ოპოზიცია - ეს ხელისუფლების გადასაწყვეტი არაა", - აღნიშნა ხოშტარიამ რუსთავი 2-თან საუბრისას.