რუსეთის საგარეო უწყებაში, სირიაში, რუსი ჯარისკაცების დაღუპვაზე ინფორმაციას უარყოფენ და უცხოურ მედიას სიცრუის გავრცელებაში ადანაშაულებენ. ამის შესახებ საგარეო უწყების პრესსპიკერმა განაცხადა.

მისი თქმით, Bloomberg-ის, The New York Times -ის და CNN-ის "თითქოსდა მამხილებელი" მასალები იმის შესახებ, რომ ამერიკულ ავიაიერიშს ასეულობით რუსი ჯარისკაცი ემსხვერპლა, სიცრუე და ტერორისტების ინტერესებს უწყობს ხელს.

"რატომ ავრცელებენ ასეთ ხმებს ტერორისტები ჩვენთვის გასაგებია, მგონი თქვენთვისაც. რისთვის სჭირდება ამის გავრცელება ამერიკულ მედიას, ახლა ესეც გასაგებია."

პრესსპიკერის განცხადებით, პირველადი მოკვლევით დადგინდა, რომ სავარაუდოდ რუსეთის 5 მოქალაქეა გარდაცვლილი და რამდენიმე დაშავებული. მისი თქმით, მიუხედავად იმისა, რომ ეს ინფორმაცია დასაზუსტებელია დაღუპულთა რიცხვი მაინც არ არის დიდი. ამასთანავე, მან ხაზგასმით აღნიშნა, რომ საუბარი არაა რუს ჯარისკაცებზე და ავიაიერიშისას ისინი არ დაღუპულან.

პრესსპიკერი მოუწოდებს ამერიკას "საკუთარ თავს მიხედონ", იმის ნაცვლად, რომ რუსეთის ფედერაციაზე დეზინფორმაცია გაავრცელონ.

აშშ-ის ხელმძღვანელობით საერთაშორისო კოალიციამ 7 თებერვალს დაირ-ელ-ზავრის რეგიონში ბაშარა ალ ასადის შეიარაღებულ მომხრეებზე ავიაიერიში მიიტანა. მედიაში გავრცელდა ინფორმაცია, რომ იერიშის შედეგად რუსი მებრძოლეებიც დაიღუპნენ, რომლებიც სირიის სამთავრობო ძალების მხარეს იბრძოდნენ.

დაღუპულთა რიცხვის შესახებ სხვადასხვა ინფორმაცია გავრცელდა. Bloomberg და The New York Times წერდა, რომ იერიშის შედეგად 200-ზე მეტი რუსი მებრძოლი დაიღუპა.