საზოგადოებრივი მაუწყებლის ახალი შენობა მისი საკუთრება არ იქნება, რადგან ის სახელმწიფოს ბალანსზე არსებულ მიწაზე შენდება. საერთაშორისო გამჭვირვალობა - საქართველოს ცნობით, სახელმწიფოს რჩება უფლება საკუთარი შეხედულებისამებრ განკარგოს მისი კუთვნილი მიწისა და სამომავლოდ მასზე აშენებული შენობის ბედიც.

2017 წლის ბოლოს, სახელმწიფომ და საზოგადოებრივ მაუწყებელს პოლიტკოვსკაიას ქუჩაზე არსებული მიწა სარგებლობის უფლებით უსასყიდლოდ გადასცა. თუმცა, TI-ის ცნობით, მაუწყებელს ეზღუდება მნიშვნელოვანი ფინანსური გადაწყვეტილებების დამოუკიდებლად მიღების შესაძლებლობა. მათ შორის, ქონების იპოთეკით დატვირთვა, დაგირავება, გაყიდვა. სახელმწიფოს ასევე უფლება აქვს შესაბამისი ღირებულების გადახდის შემთხვევაში, ნებისმიერ დროს მოსთხოვოს საზოგადოებრივ მაუწყებელს მიწისა და შენობის მისთვის გადაცემა.

საერთაშორისო გამჭვირვალობა - საქართველოს მიაჩნია, რომ:

  • უნდა შეიცვალოს გადაწყვეტილება სახელმწიფოს მიერ საზოგადოებრივი მაუწყებლისთვის მიწის სარგებლობის უფლებით გაცემის შესახებ;
  • უნდა შეირჩეს მიწის/შენობის გადაცემასთან დაკავშირებული გადაწყვეტილებების ისეთი ფორმა, რომ საზოგადოებრივი მაუწყებლის მიერ მიწისა თუ შენობის საკუთრების საკითხი საეჭვო არ იქნება.

დღეს, საზოგადოებრივ მაუწყებელს ეკუთვნის კოსტავას ქუჩაზე 33 209 კვ.მ. მიწის ნაკვეთი და მასზე განლაგებული შენობა-ნაგებობები. პოლიტკოვსკაიას ქუჩაზე, ახალი შენობისთვის მშენებლობის ხარჯების დასაფარად, TI-ის ცნობით, მაუწყებელი სესხის გამოტანას აპირებს, თავად მშენებლობის დასრულება კი 2020 წლისთვის იგეგმება.

საზოგადოებრივი მაუწყებლის მენეჯმენტის წარმომადგენლები On.ge-ს სატელეფონო ზარებს, ამ ეტაპზე, არ პასუხობენ.