დეკანოზ გიორგი მამალაძის ადვოკატი, მიხეილ რამიშვილი ამბობს, რომ სააპელაციო სასამართლოს გადაწყვეტილებას უზენაეს სასამართლოში გაასაჩივრებენ. ამის შესახებ რამიშვილმა სააპელაციო სასამართლოს გადაწყვეტილების გამოცხადების შემდეგ განაცხადა, სადაც დეკანოზისთვის 9-წლიანი პატიმრობა ძალაში დარჩა.

"სასამართლო საქართველოში არ არსებობს. იმედი გვქონდა რომ რეანიმაციაში იყო, მაგრამ გარდაცვლილია. ქვეყანაში არა არსებობს დამოუკიდებელი, სამართლიანი მოსამართლე. ეს შეკვეთის და დავალების გაგრძელებაა", - განაცხადა რამიშვილმა.

მისი თქმით, სააპელაციო სასამართლოს მოსამართლემ საქალაქო სასამართლოს გადაწყვეტილება დააკოპირა და ერთადერთი გზა მხოლოდ ევროპის ადამიანის უფლებათა დაცვის სასამართლოა.

"თუ პირადი ინტერესი არსებობს, ვერასდროს მიიღებს ადამიანი სამართლიანობას. ეს არის ნიშანი ხელისუფლებიდან, მართლმსაჯულებიდან, რომ თუ რამე ინტერესი იქნება საწინააღმდეგო ჩვენი ხელისუფლების ყოველთვის მოარგებენ იმ გადაწყვეტილებას, რომლითაც საზოგადოებაში იქნება შიში. დროა ხალხი ვიყოთ მოსამართლეები და ხალხმა გადავწყვიტოთ ვინაა მტყუანი და ვინ მართალი", - დასძინა რამიშვილმა.

თბილისის საქალაქო სასამართლომ გადააკვალიფიცირა გიორგი მამალაძისთვის წარდგენილი ბრალდება და იგი დამნაშავედ ცნო განზრახ მკვლელობის მომზადებაში, სსკ-ის 18,108-ე მუხლით.