გაერთიანებული ერების ადამიანის უფლებათა საბჭომ მიიღო გადაწყვეტილება, რომლის მიხედვითაც „სექსუალური ორიენტაციისა და გენდერული იდენტობის ნიშნით ძალადობისა და დისკრიმინაცისგან დაცვის“ მანდატი დამოუკიდებელ ექსპერტს მიენიჭა. ინფორმაციას Human Rights Watch ავრცელებს.

ეს არის ისტორიული გამარჯვება ადამიანის უფლებებისთვის ყველა ადამიანისთვის, ვინც დისკრიმინაციისა და ძალადობის რისკის ქვეშაა სექსუალური ორიენტაციისა და გენდერული იდენტობის გამო - განაცხადა 28 ადამიანის უფლებათა ჯგუფმა.

რეზოლუცია 23 მომხრით, 18 წინააღმდეგით და 6 თავშეკავებით მიიღეს.

ინიციატივა 628 არასამთავრობო ორგანიზაციას ეკუთვნოდა 151 ქვეყნიდან. მათი ერთობლივი კამპანია საბჭოს მოუწოდებდა მიეღო გადაწყვეტილება დამოუკიდებელი ექსპერტის დანიშვნასთან დაკავშირებით.

ექსპერტის მოვალეობა იქნება:

  • ადამიანის უფლებების შესახებ საერთაშორისო კანონის აღსრულების შეფასება;
  • საუკეთესო პრაქტიკისა და ხარვეზების იდენტიფიცირება;
  • სექსუალური ორიენტაციისა და გენდერული იდენტობის ნიშნით ძალადობისა და დისკრიმინაციის შესახებ ცნობიერების ამაღლება;
  • დიალოგებსა და კონსულტაციებში ჩართვა სახელმწიფოებსა და სხვა დაინტერესებულ მხარეებთან;
  • საკონსულტაციო სერვისების ხელმისაწვდომობის უზრუნველყოფა;
  • ტექნიკური მხარდაჭერა;
  • პოტენციალის ზრდა და თანამშრომლობა აღნიშნული ნიშნით ძალადობისა და დისკრიმინაციის აღმოსაფხვრელად.

რეზოლუციის მიღების მომხრეები:

ალბანეთი, ბელგია, ბოლივია, კუბა, ეკვადორი, ელ სალვადორი, საფრანგეთი, საქართველო, გერმანია, ლატვია, მაკედონია, მექსიკა, მონღოლეთი, ნიდერლანდები, პანამა, პარაგვაი, პორტუგალია, კორეის რესპუბლიკა, სლოვენია, შვეიცარია, გაერთიანებული სამეფო, ვენესუელა, ვიეტნამი.

რეზოლუციის მიღების მოწინააღმდეგეები:

ალჟირი, ბანგლადეში, ბურუნდი, ჩინეთი, კონგო, კოტ-დ’იუვარი, ეთიოპია, ინდონეზია, კენია, ყირგიზეთი, მალდივები, მაროკო, ნიგერია, ყატარი, რუსეთი, საუდის არაბეთი, ტოგო, არაბეთის გაერთიანებული საამიროები.

ქვეყნები, რომლებმაც ხმის მიცემისგან თავი შეიკავეს:

ბოტსვანა, განა, ინდოეთი, ნამიბია, ფილიპინები, სამხრეთ აფრიკა.