ეროვნულ-დემოკრატიული ინსტიტუტის კვლევის მიხედვით, საქართველოს მოსახლეობის 77 პროცენტი სექსუალური შევიწროების შესახებ კანონის მიღების მომხრეა. კანონის მიღებას გამოკითხულთა მხოლოდ 14 პროცენტი ეწინააღმდეგება, დარჩენილი ნაწილი კი ამბობს, რომ "არ იცის".

კანონის მიღების მომხრეების ყველაზე დაბალი წილი (48%) უმცირესობათა დასახლებებშია, ყველაზე მაღალი (89%) კი პატარა ქალაქებში.

თუ იმავე კითხვაზე პასუხების გამცემებს სქესის მიხედვით დავყოფთ, ასეთ შედეგს ვიღებთ: მსგავსი კანონის მიღებას კაცების 18 პროცენტი და ქალების 9 პროცენტი ეწინააღმდეგება. რაც შეეხებათ მომხრეებს, კაცების 71 პროცენტია მომხრე და ქალების 83.

ფოტო: ფოტო პრეზენტაციიდან / NDI

UK aid-ის ფინანსური ხელშეწყობით კვლევა NDI-ის დაკვეთით CRRC საქართველომ ჩაატარა. წარმომადგენლობითი შერჩევით (ოკუპირებული ტერიტორიების გარდა) კვლევა 29 ნოემბრიდან 19 დეკემბრამდე პერიოდში ჩატარდა, პირისპირ ინტერვიუთი გამოიკითხა 2 298 ადამიანი (გამოპასუხება 48%). კვლევაში მონაწილე პირები შემთხვევითი შერჩევის მეთოდით შეირჩნენ, ცდომილება კი - 1,9 პროცენტია.