შინაგან საქმეთა სამინისტროს თანამშრომლებმა საქართველოს პროკურატურასთან თანამშრომლობით ჯგუფური ყაჩაღობის მომზადების ბრალდებით ხუთი პირი დააკავა.

როგორც შინაგან საქმეთა სამინისტროს მიერ გავრცელებულ ინფორმაციაშია აღნიშნული, დაკავებულებს ერთ-ერთი სადისტრიბუციო კომპანიის დისტრიბუტორის დაყაჩაღება სურდათ. დისტრიბუტორს სამსახურეობრივი მანქანით უნდა გადაეტანა ფული, თბილისში, ვარკეთილის მეტროს მიმდებარე ტერიტორიაზე, არსებულ პროკრედიტ ბანკის ფილიალში.

"დანაშაულებრივი დაჯგუფების წევრებმა პროკრედიტ ბანკის ფილიალის ტერიტორია შეისწავლეს, იქვე მდებარე მშენებარე შენობაში ორი ავტომატური ცეცხლსასროლი იარაღი და პისტოლეტი, საბრძოლო ვაზნებთან ერთად, წინასწარ გადამალეს და დანაშაულის ჩასადენად ფუნქციები გადაინაწილეს", - აღნიშნავენ შსს-ში.

გამოძიება დიდი ოდენობით ნივთის დაუფლების მიზნით ჯგუფური ყაჩაღობის მომზადების საქმეზე მიმდინარეობს, საქართველოს საქართველოს სისხლის სამართლის კოდექსის 18-179-ე მუხლის მეორე ნაწილის "ბ" ქვეპუნქტით და მესამე ნაწილის "გ" ქვეპუნქტით. ამ მუხლებით თავისუფლების აღკვეთა ექვსიდან 12 წლამდე ვადითაა გათვალისწინებული.