ნაციონალური მოძრაობის წინასაარჩევნო პროგრამის მიხედვით, მათი პრიორიტეტი დასაქმება და ეკონომიკური განვითარებაა, კერძოდ დოკუმენტში მითითებულია, რომ 2017 წელს, 40 ათასზე მეტი სამუშაო ადგილი შეიქმნება.

პარტიის ერთ-ერთი ლიდერის, სერგი კაპანაძის განცხადებით, საშემოსავლო და განაწილებულ მოგებაზე გადასახადი 10%-მდე შემცირდება. მისივე თქმით, მათი არჩევის შემთხვევაში, მოგების გადასახადის გაუქმება 2017 წლის 1 იანვრიდან შევა ძალაში.

ნაციონალური მოძრაობის პროგრამის თანახმად, განაწილებული მოგების გადასახადი ეტაპობრივად, თავდაპირველად 15%-მდე, შემდეგ 12,5%-მდე და საბოლოოდ 10%-მდე შემცირდება.

რაც შეეხება საშემოსავლო გადასახადს, ენმ-ის გეგმის თანახმად, ისიც ეტაპობრივად შემცირდება. პარტიის ლიდერების განცხადებით, იგი 3 წელიწადში, 20%-დან, ჯერ 15%-მდე, შემდეგ 12,5%-მდე საბოლოოდ კი 10%-მდე შემცირდება.

ნაციონალური მოძრაობა ამომრჩეველს ასევე ფინანსური პოლიციის გაუქმებას ჰპირდება:

"ფინანსური პოლიცია უქმდება იმის გამო, რომ არ მოხდეს იმ წნეხის განმეორება, რაც ხდებოდა ბიზნესებზე ადრე და ხდება ახლაც. ბიზნესს ექნება უფრო მეტი თავისუფლება და ისინი შეძლებენ უფრო ლაღად ყოფნას".

მისივე განცხადებით, პარტია ბიუროკრატიის შემცირებას, ანუ მთავრობის ზომის შემცირებას გეგმავს.