საქართველოს პარლამენტის წევრი ქართული ოცნებიდან ეკა ბესელია ამბობს, რომ საქართველოს ყოფილი პრეზიდენტის, მიხეილ სააკაშვილის შემდეგი სამართლებრივი პროცედურა ორმხრივი სამართლებრივი თანამშრომლობის ფარგლებში მოხდება. ასე გამოეხმაურა ბესელია სააკაშვილის უკრაინაში დაკავებას.

"მოთხოვნა აქამდეც იყო გაგზავნილი ექსტრადირების თაობაზე და ამ თემაზე გაკეთებული აქვს იუსტიციის სამინისტროსა და მთავარ პროკურატურას განცხადებები. ეს სამართლებრივი პროცედურა საერთაშორისო თანამშრომლობის ფარგლებში საერთაშორისო და შიდა ეროვნული კანონმდებლობით უკვე დაწყებულია, იმიტომ რომ მიხეილ სააკაშვილს საქართველოში აქვს წინასწარი პატიმრობა შეფარდებული სასამართლოს მიერ, გაცემულია დაპატიმრების ბრძანება და ასევე არის ძებნის პროცედურა დაწყებული და ეს პროცედურები გავლილია. ექსტრადირებასთან დაკავშირებით თავის დროზე იყო მოთხოვნა", - აღნიშნა ბესელიამ.

უკრაინაში მიხეილ სააკაშვილი დაახლოებით ერთი საათის წინ დააკავეს. დილიდან გენერალური პროკურატურა და უსაფრთხოების სამსახური, საქართველოს ყოფილი პრეზიდენტის ბინას ჩხრეკდა. ჩხრეკის გამო ის შენობის სახურავზე ავიდა და გადმოხტომით იმუქრებოდა.