ხორავას ქუჩაზე არასრულწლოვნების მკვლელობის დაფარვისთვის კიდევ ორ პირს ბრალი წაეყენა. ამის შესახებ ინფორმაციას საქართველოს პროკურატურა ავრცელებს.

შესაბამისად, ამ საქმისთვის ბრალი სულ ხუთ პირს აქვს წაყენებული, მათგან სამის შესახებ ინფორმაცია დღეს, 4 დეკემბერს, დილით გავრცელდა. შინაგან საქმეთა მინისტრმა, გიორგი გახარიამ კი, დღესვე განაცხადა, რომ დანაშაულში მონაწილე ყველა პირი დადგენილი და დაკავებულია.

"ისინი [ბრალდებულები] აქტიური ქმედებებით შეეცადნენ დანაშაულის კვალის დაფარვას, საქმისთვის მნიშვნელობის მქონე მტკიცებულებების გადამალვას და განადგურებას, ასევე ხელი შეუწყეს არასრულწლოვანი გ.ჯ-ს მიმალვას", - აღნიშნავენ პროკურატურაში.

ყველა მათგანს ბრალი საქართველოს სისხლის სამართლის კოდექსის 375-ე მუხლით (დანაშაულის დაფარვა) წარედგინა. ბრალდებულთაგან სამი დაკავებულია, ხოლო ორზე არასრულწლოვანთა მართლმსაჯულების კოდექსი ვრცელდება, რის გამოც არ დააკავეს.

"ერთი მათგანი არის 17 წლის და ნაკლებად მძიმე დანაშაულისთვის კანონი არ ითვალისწინებს მის დაკავებას, ხოლო მეორე პირი არის 21 წლამდე, აღიარებს ჩადენილ დანაშაულს და თანამშრომლობს გამოძიებასთან, ასევე გათვალისწინებულია ის გარემოება, რომ მოცემულ საქმეზე ბრალდებულის სახით დაკავებულია მისი მამა", - განმარტავენ პროკურატურაში.

დღესვე ცნობილი გახდა, რომ დაკავებულებიდან ერთ-ერთი ინციდენტის დროს შინაგან საქმეთა სამინისტროს თანამშრომელი იყო, დღეს კი - მისი გათავისუფლების შესახებ გადაწყვეტილება უკვე მიღებულია.

პირველ დეკემბერს, თბილისში, ხორავას ქუჩაზე არასრულწლოვნებს შორის ურთიერთშელაპარაკების შედეგად მოკლეს ორი მოზარდი. ლევან დადუნაშვილი საავადმყოფოში მიყვანამდე გარდაიცვალა. დავით სარალიძეს საავადმყოფოში სამი ოპერაცია გაუკეთდა, თუმცა ის მომხდარიდან მეორე დღეს გარდაიცვალა. მკვლელობის ბრალდება ორ არასრულწლოვანს წაუყენეს. ორივე მათგანი დაკავებულია.