თბილისის საქალაქო სასამართლომ თბილისში, ხორავას ქუჩაზე, მკვლელობაში ბრალდებულ ორ არასრულწლოვანს პატიმრობა შეუფარდა. სასამართლომ ბრალდებულებისთვის აღკვეთის ღონისძიებაზე რამდენიმე წუთის წინ იმსჯელა, - ამის შესახებ On.ge-ს სასამართლოს პრესსამსახურში განუცხადეს.

იმის გამო, რომ საქმეში ბრალდებული პირები არასრულწლოვნები არიან, სასამართლო სხდომა დახურული იყო, შესაბამისად, აღკვეთის ღონისძიებაზე მსჯელობის დეტალები უცნობია.

პირველ დეკემბერს, თბილისში, ხორავას ქუჩაზე არასრულწლოვნებს შორის ურთიერთშელაპარაკების შედეგად დაიღუპა ორი მოზარდი. ლევან დადუნაშვილი საავადმყოფოში მიყვანამდე გარდაიცვალა. დავით სარალიძეს საავადმყოფოში სამი ოპერაცია გაუკეთდა, თუმცა ის მომხდარიდან მეორე დღეს გარდაიცვალა.

საქმეზე ბრალი თავდაპირველად ორ არასრულწლოვანს წაუყენეს. დღეს, 4 დეკემბერს კი, შინაგან საქმეთა სამინისტროს განცხადებით, ხორავას ქუჩაზე მომხდარი განზრახ მკვლელობის ფაქტთან დაკავშირებით კიდევ სამი პირი დააკავეს. მათ დანაშაულის დაფარვისთვის ედებათ ბრალი. უწყების თქმით, დაკავებულებიდან ორი ძებნაში მყოფ არასრულწლოვანს მიმალვაში დაეხმარა.