კომიკოსებისთვის, რომლებსაც სთენდაფ კომედის ჟანრში თავის მოსინჯვა და გამოცდილების მიღება სურთ, ნიკა ქავთარაძემ შესარჩევი კონკურსი დაიწყო.

მისი ინიციატივით, თბილისის სხვადასხვა ადგილებში უცნობები და ცნობილი სახეები ყოველკვირეულად წარსდგებიან იუმორისტული პროგრამებით:

"ეს ჩვენი პროგრამა სატელევიზიო არ იქნება - გარეთ გამოგვაქვს იუმორი, კლუბებში, ბარებში, საკონცერტო დარბაზებში და ა.შ. ყოველკვირეულად იქნება ახალი პროგრამა, 4-5 კაციანი ჯგუფები ახალ-ახალი იდეებით" - უთხრა ნიკა ქავთარაძემ On.ge-ს.

მსურველები საკუთარი ვიდეოების გაგზავნას ნიკა ქავთარაძის ფეისბუკის პეიჯზე შეძლებენ.

"ახალი მოძრაობა იქოქება, რომელიც ყველა ნიჭიერი კომიკოსისთვისაა ღია. ზოგადად, სთენდაფის იდეა ძალიან კარგია და კომიკოსები ამ ჟანრში ყველაზე კომფორტულად გრძნობენ თავს, რადგან ლაივში პუბლიკის აღფრთოვანება გამოცდილების მხრივ ძალიან მნიშვნელოვანია".

ჯერჯერობით უცნობია, კონკრეტულად რომელ ადგილებში შეძლებენ სთენდაფ-კომედის მოყვარულები მისვლას, თუმცა მალე თბილისში ყოველ კვირას იქნება ადგილი, სადაც შეძლებთ, რომ მიხვიდეთ, იცინოთ და გაერთოთ.