გირჩის წევრის, იაგო ხვიჩიას აზრით, ადამიანები, რომლებიც ბათუმში მომხდარი ტრაგედიის შემდეგ სახანძრო უსაფრთხოების საკითხის რეგულირებას ითხოვენ ამორალურები და უნამუსოები არიან. ამის შესახებ ხვიჩია Facebook-ზე წერს.

სასტუმრო ლეოგრანდში გაჩენილი ხანძრის შედეგად, 11 ადამიანი დაიღუპა. მათ შორის, 10 საქართველოს, ხოლო ერთი ირანის მოქალაქე. შინაგან საქმეთა მინისტრმა, გიორგი გახარიამ განაცხადა, რომ შენობაში სახანძრო ნორმები და მოთხოვნები დარღვეული იყო.

რეგულაციების ამოქმედებას და ქვეყანაში მოქმედი სასტუმროების შემოწმებას ითხოვს საქართველოს სახალხო დამცველი. მისი აზრით, თუკი სახანძრო უსაფრთხოების წესების დაცვა მოთხოვნილი არ იყო, ანდა მოთხოვნის მიუხედავად, გათვალისწინებული არ ყოფილა, უნდა დადგინდეს და გამოვლინდეს იმ თანამდებობის პირთა ვინაობა, ვინც სასტუმროს მშენებლობის და ფუნქციონირების ნებართვა გასცა.

ეს არ არის პირველი შემთხვევა, როცა სასტუმროში გაჩენილი ხანძარი მსხვერპლით დასრულდა. 2015 წლის 10 მაისს, ქობულეთში ერთ-ერთ სასტუმროში მომხდარი ხანძრის შედეგად, სავარაუდოდ, სახანძრო ნორმების დარღვევის გამო, 3 ბავშვი დაიღუპა.