ირაკლი კობახიძემ ჟურნალისტებთან საუბრისას განაცხადა, რომ სსიპ სახელმწიფო გრანტების მართვის სააგენტო მილევად რეჟიმშია და წლის ბოლომდე დაიხურება. ამის შესახებ მან NGO-ებზე საუბრისას განაცხადა.

"NGO არის ხელოვნური ფენომენი, რომელიც არის მოგონილი ხელოვნურად, უცხოური პოლიტიკური ინტერვენციისთვის. როდესაც ჩვენ შევქმენით შესაბამისი სააგენტო, გამოჩნდა, რომ ეს ასეა. NGO თავისთავად, არის ხელოვნური ფენომენი. NGO-ს ერთადერთი მიზანი შეიძლება იყოს ერთი სახელმწიფოს ინტერვენცია მეორე სახელმწიფოში. ამისთვის მოიგონეს ენჯეოები თავის დროზე. ერთი საუკუნის წინ ენჯეოები არ არსებობდნენ. შემდეგ მოიგონეს და ენჯეოებს იყენებდნენ, როგორც უცხოური ინტერვენციის მთავარ ინსტრუმენტს. ამის არაერთი მაგალითი ვნახეთ საქართველოში. შესაბამისად, ჩვენ მოვიგონოთ ენჯეოები და ასეთი რამ დავაფინანსოთ, ასეთი რამ არასწორია, შესაბამისად, ამის გამო მივიღეთ ასეთი გადაწყვეტილება," — განაცხადა კობახიძემ.

აღსანიშნავია, რომ გრანტების მართვის სააგენტო დაახლოებით წელიწადნახევრის წინ შეიქმნა. კერძოდ, 2025 წლის 16 აპრილს პარლამენტმა III მოსმენით მიიღო კანონპროექტი, რომელიც მთავრობის თანხმობის გარეშე გრანტების მიღება აკრძალა. ამავე თვეში ქართული ოცნების ინიციატივით "სამოქალაქო საზოგადოების მხარდასაჭერად" გრანტების მართვის სააგენტო იქმნება, რომლის თავმჯდომარედ თამარ ზოდელავა დანიშნეს.

სააგენტოს მიზნად საქართველოს ბიუჯეტით საქართველოში მოქმედი საზოგადოებრივი ორგანიზაციების მხარდაჭერა გაცხადდა, "რომელთა საქმიანობის მიმართულებები თანხვედრაში იქნება ქვეყნის განვითარების პრიორიტეტულ მიმართულებებთან". ამასთან, სახელმწიფო სააგენტოს არასამთავრობო ორგანიზაციებზე გრანტების გაცემის უფლებამოსილება მიენიჭა.

მთავრობის განკარგულების მიხედვით, გრანტის მართვის სააგენტოს თავმჯდომარის ხელფასი 11 600 ლარი, ანუ წლიურად 139 200 ლარია. უცნობია თანამშრომელთა ზუსტი რიცხვი, თუმცა კანონპროექტის მიხედვით, სააგენტოში დაახლოებით 10 პირი უნდა დასაქმებულიყო.

მიმდინარე წლის 21 იანვარს თამარ ზოდელავა სააგენტოს თავმჯდომარეობის პოზიციას ტოვებს და იუსტიციის მინისტრის მოადგილედ ინიშნება. მისი ადგილი თათია ნანეიშვილმა დაიკავა, რომელიც მანამდე თავმჯდომარის მოადგილის პოსტს იკავებდა.