საერთაშორისო გამჭვირვალობა - საქართველოში მიიჩნევენ, რომ მედიის მიერ საზოგადოებრივი აზრის კვლევის გამოქვეყნება საფრთხის წინაშეა. ორგანიზაციაში აღნიშნავენ, რომ პრობლემურია არსებული კანონმდებლობის ფარგლებში მარეგულირებელი კომისიის მიერ არაპროპორციული მოთხოვნების წაყენება მედიის მიმართ.

როგორც საერთაშორისო გამჭვირვალობა - საქართველოში ამბობენ, კომუნიკაციების კომისიამ თვითმმართველობის არჩევნებამდე საკანონმდებლო წინადადება წარადგინა, რომლიც მაუწყებლებს საზოგადოებრივი აზრის კვლევის სანდოობასა და შედეგების ობიექტურობის გადამოწმებას ავალდებულებს. როგორც ორგანიზაციაში განმარტავენ, ამით მარეგულირებელს სურს სამართლებრივად გაამყაროს მის მიერვე დამკვიდრებული პრაქტიკა.

"მიგვაჩნია რომ ეს ნორმა მიზნად ისახავს კონტენტში ჩარევას და მარეგულირებლის მიერ კვლევის ჩატარებასთან დაკავშირებით სიღრმისეული დეტალების გადამოწმება პრაქტიკაში შეუძლებელია და ზრდის შერჩევითი მიდგომის რისკებს. კვლევის ხარისხზე პასუხისმგებელია თავად კვლევითი ორგანიზაცია და პასუხისმგებლობის მედიაზე გადატენა მიუღებელია", - დასძენენ საერთაშორისო გამჭვირვალობა - საქართველოში და აღნიშნავენ, რომ ცვლილებების პროექტი შესაძლოა, ნეგატიურად აისახოს კვლევაში მონაწილე პირებზე, რადგან შესაძლოა, მათი პოზიცია კომუნიკაციების კომისიისთვის გახდეს ცნობილი.

მათივე მოსაზრებით, დღევანდელი მდგომარეობიდან გამომდინარე, საზოგადოებრივი აზრის სანდოობისა და ობიექტურობის მსგავსი მეთოდებით გადამოწმებისთვის კომუნიკაციების ეროვნულ კომისიას ადამიანური და პროფესიული რესურსი არ გააჩნია.

"საერთაშორისო გამჭვირვალობა - საქართველო მოუწოდებს კომუნიკაციების ეროვნულ კომისიას თავი შეიკავოს მედია საშუალებების მიმართ არაპროპორციული მოთხოვნების წაყენებისაგან, რომელიც მედიის მიერ სამომავლოდ მსგავსი კვლევების ჩატარებასა და შედეგების გამოქვეყნებას საფრთხეს შეუქმნის და შეუზღუდავს მოსახლეობას არჩევნების პერიოდში მაღალი საზოგადოებრივი ინტერესის შემცველი კვლევებისა თუ ეგზიტპოლების მონაცემებს გაეცნოს", - აღნიშნავენ ორგანიზაციაში და საქართველოს პარლამენტს მოუწოდებენ შეაჩეროს კომუნიკაციების ეროვნული კომისიის მიერ წარდგენილი საკანონმდებლო წინადადების განხილვა.