პარლამენტის პლენარულ სხდომაზე საზოგადოებრივი მაუწყებლის სამეურვეო საბჭოს წევრებად გია მურღულია და დავით ქართველიშვილი აირჩიეს, ხოლო მესამე ადგილი ვაკანტური დარჩა.

გია მურღულიას საბჭოს წევრობის კანდიდატად ქართულმა ოცნებამ წარადგინა. მურღულია საზოგადოებრივი მაუწყებლის სამეურვეო საბჭოს წევრი პირველად 2020 წელს გახდა. 2024 წლის 1 თებერვლიდან კი ის სამეურვეო საბჭოს თავმჯდომარის, ვასილ მაღლაფერიძის, მოადგილე იყო. დავით ქართველიშვილი ფრაქცია ხალხის ძალის კანდიდატი იყო.

გახარია საქართველოსთვის მიერ წარდგენილმა სამმა კანდიდატმა — თეონა გეგელიამ, ელისო გაბადაძემ და თეიმურაზ კეკელიძემ საჭირო 76 ხმა ვერ დააგროვა.

მურღულია და ქართველიშვილი საზოგადოებრივი მაუწყებლის სამეურვეო საბჭოში უფლებამოსილების განხორციელებას 2 ივლისიდან დაიწყებენ.