მოსამართლე გიორგი გელაშვილმა 4 ოქტომბრის საქმეზე დაკავებული 7 პირი დამნაშავედ ცნო: დავით ჟღენტს მიესაჯა პატიმრობა 5 წლით; კახაბერ მჟავანაძეს — 5 წლით; დავით სტურუას — 5 წლით; კონსტანტინე კოკაიას — 5 წლით; გიორგი ჩახუნაშვილს — 5 წლით; ზაქრო ალბუთაშვილს — 5 წლით; ია დარახველიძეს — 3 წლით.

გოგი ჩახუნაშვილი და ია დარახველიძე გირაოს სანაცვლოდ გარეთ იყვნენ. დღევანდელი განაჩენის შემდეგ, პატიმრობა დაკავების დღიდან აითვლება. ორივე მათგანს გირაოს თანხა კი უკან დაუბრუნდებათ.

ია დარახველიძე სასამართლო პროცესზე არ იმყოფებოდა. პროცესის შემდეგ ცნობილი გახდა, რომ მასზე ქვეყნის მასშტაბით ძებნა გამოცხადდა. ადვოკატის განცხადებით, მისი ადგილმდებარეობის შესახებ ინფორმაცია არ აქვთ.

"სასამართლო გადაწყვეტილება, რომელიც, რა თქმა უნდა, არის უკანონო დაუსაბუთებელი, შეუძლებელია არგუმენტაცია ჩვენ მომავალში თუნდაც წავიკითხოთ იმ გადაწყვეტილებაში, რომელიც დაიწერება მოსამართლის მიერ, უნდა გამოეტანა მხოლოდ და მხოლოდ გამამართლებელი განაჩენი, რეალობა ასეთი გვაქვს თავისუფლების აღკვეთა მიუსაჯა მოსამართლემ.

რა თქმა უნდა, თავადვე განმარტა სასამრთლომ როგორც კი იქნება შესაბამისი უწყების მიერ ან ჩაბარება იასი, ან დაკავება, აითვლება მისი სასჯელის ვადა, ამ ეტაპისთვის ჩატარდება პროცედურები როგორიც არის, ეგრეთწოდებული ძებნაზეც გადაეცამა ქალბატონ იას," — განაცხადა დარახველიძის ადვოკატმა რევაზ აჭარაძემ.

მოსამართლის გადაწყვეტილებას უსამართლოდ მიიჩნევენ მსჯავრდებულის ოჯახის წევრებიც. კახაბერ მჟავანაძის შვილმა, ლევან მჟავანაძემ პროცესის დასრულების შემდეგ ჟურნალისტებთან განაცხადა, რომ მამის ადგილს დაიკავებს.

"ამ გადაწყვეტილებას, რა თქმა უნდა, ველოდი, როგორც ყველა აქ დამსწრე, რადგან ყველამ კარგად ვიცით, რომ ეს არ იყო წმინდა სამართლებრივი საქმე, ეს იყო პოლიტიკური სარჩულის მქონე საქმე და გადაწყვეტილებაც იყო შესაბამისი, დაშტამპული, 5 წელი ყველა ბრალდებულის მიმართ.

მე დავიკავებ იმ ადგილს, რომელიც მამაჩემს ეკავა, ამ გადაწყვეტილებას და სასჯელს მე და ჩემი ოჯახი მივიღებთ, როგორც პატივს, როგორც მსხვერპლს, ჩემი ქვეყნისთვის," — განაცხადა ლევან მჟავანაძემ.

72 წლის ექიმის შვილის, კონსტანტინე ჩახუნაშვილის განცხადებით, "ან შევეგუებით ამ უსამართლო სისტემას ან შევცვლით ყველაფერს".

"მოსამართლის გადაწყვეტილება ბოლო რამდენიმე წლის განმავლობაში არის უსამართლო. იქიდან გამომდინარე, რომ გადაწყვეტილება მოდის დაწერილი და შესაბამისად დავალებას ასრულებს მოსამართლე. ადამიანი ყვავილის სროლის გამო ჰყავდათ 9 თვე გამოკეტილი ციხეში და ედავებოდნენ სახელმწიფო გადატრიალებას და შესაბამისად, ნებისმიერი ადამიანი, რომელიც იქ უბრალოდ იდგა შეიძლება ყოფილიყო იდენტიფიცირებული და იგივე ბრალი წაეყენებინათ. ჩვენ ან შევეგუებით ამ უსამართლო სისტემას ან შევცვლით ყველაფერს", — განაცხადა პედიატრმა კონსტანტინე ჩახუნაშვილმა მას შემდეგ, რაც მოსამართლე გიორგი გელაშვილმა მამამის, ექიმ გოგი ჩახუნაშვილის 4 ოქტომბრის საქმეზე, 5-წლიანი პატიმრობა შეუფარდა.

შეგახსენებთ, აღნიშნულმა პირებმა პროკურატურასთან საპროცესო შეთანხმების გაფორმებაზე უარი განაცხადეს. 4 ოქტომბრის საქმეზე საპროცესო შეთანხმება 22 პირმა გააფორმა. საპროცესო შეთანხმება "დანაშაულის აღიარებას" და 3-წლიან პირობით მსჯავრს გულისხმობს.