ექსპერტებმა 2026 წლის ყველაზე თვალშისაცემი ფოტოები შეაფასეს და მათსა და ხელოვნების ისტორიის შედევრებს შორის პარალელები გაავლეს.

აი, ის 9 ფოტო, რომლებმაც წელს მსოფლიოს ყურადღება მიიპყრო:

1. ნიკოლას მადუროსა და სილია ფლორესის დაკავება

2026 წლის იანვრის დასაწყისში, აშშ-ის სპეცსამსახურებმა ვენესუელას პრეზიდენტი ნიკოლას მადურო და მისი მეუღლე, სილია ფლორესი დააკავეს. ფოტოზე ისინი შეიარაღებულ აგენტებთან ერთად ხელბორკილებით, წელში მოხრილნი არიან აღბეჭდილნი.

ძლიერი ლიდერების ასეთი მოულოდნელი დამხობა და ძალაუფლების დაკარგვა ექსპერტებმა ვიქტორიანული ეპოქის მხატვრის, ჩარლზ ისტლეიკის, ნამუშევარს შეადარეს, რომელმაც ნაპოლეონი ტყვეობისას აღბეჭდა.

2. ბაგარუმბას მოცეკვავეები

იანვარში, ინდოეთის ქალაქ გუვაჰატიში, ბოდოს საზოგადოების წევრებმა ტრადიციული "პეპლების ცეკვით" გინესის რეკორდის დამყარება სცადეს. სტადიონზე ზემოდან გადაღებულმა ფოტომ მოცეკვავეთა სხეულები ფერად, უწყვეტ გეომეტრიულ მოზაიკად აქცია. რიტმული მოძრაობის გეომეტრიასთან შერწყმამ, ზუსტად გაიმეორა მხატვარ პიტ მონდრიანის ცნობილი აბსტრაქტული ნამუშევარი Victory Boogie Woogie.

3. უკრაინული დრონი

უკრაინის ფრონტის ხაზთან იანვარში გადაღებულ ფოტოზე, ჯარისკაცი ჰაერიდან სათვალთვალო დრონს იჭერს. ქვემოდან გადაღებულ კადრში მასშტაბის აღსაქმელად სხვა საგანი არ ჩანს — მებრძოლი გოლიათს ჰგავს, რომელიც ნამდვილ თვითმფრინავს შუა ფრენისას იტაცებს. ეს გიგანტური ფიგურა ფრანსისკო გოიას ცნობილ ნახატ The Colossus-ს ჰგავს.

4. ენდრიუ მაუნტბატენ-უინძორის დაკავება

კადრი, რომელშიც დაკავებული ენდრიუ მაუნტბატენ-უინძორი პოლიციის განყოფილებიდან მანქანით მიჰყავთ, სოციალურ ქსელებში მალევე გავრცელდა. ყოფილი პრინცის სახეზე აღბეჭდილი შოკი სერ ჩარლზ ბელის 1806 წლის ცნობილი წიგნის — The Anatomy of Expression in Painting — ერთ-ერთ ჩანახატს შეადარეს.

5. პანჩი — მარტოსული მაიმუნი

თებერვალში, იაპონიის ქალაქ იჩიკავას ზოოპარკში გადაღებული ფოტო წლის ერთ-ერთი ყველაზე ემოციური კადრი გახდა. ფოტოზე პატარა იაპონელი მაკაკა, სახელად პანჩია აღბეჭდილი, რომელიც მის გვერდით მჯდომ სათამაშო ორანგუტანგს დიდი სიყვარულით შესცქერის. პანჩის სევდიანი და უპასუხო მზერა მე-19 საუკუნის ბოლოს მოღვაწე გერმანელი მხატვრისა და პრიმატოლოგის, გაბრიელ ფონ მაქსის ცნობილ ნახატ Monkey Before Skeleton-ს ჰგავს.

6. კატა სირიაში

2026 წლის ამ ფოტოსურათში მატრასებითა და ბალიშებით დატვირთული მანქანის ვარდისფერი მინიდან კატა რაღაცას გაოცებული შეჰყურებს. ტვირთი იმ ქურთი ლტოლვილების ნივთებია, რომლებიც სირიის სამოქალაქო ომის დასრულების შემდეგ, მშობლიურ სახლებში ბრუნდებიან. დევნილობასა და სახლში დაბრუნებას შორის გაჩერებული კატა თავისი უძრაობით ექსპერტებმა მე-17 საუკუნის ჰოლანდიელი ოსტატის, ჟერარ დუს ცნობილ ნახატ Cat on a Ledge-ს მიამსგავსეს.

7. აფროსნების კადრი სიდნეიში

აპრილში, სიდნეის ნავსადგურში გადაღებულ კადრში იახტა პირდაპირ ცისარტყელას მკვეთრ, ფერად ზოლში შედის. მეზღვაურების ცისარტყელას თითქმის ხელშესახებ ფერებთან მიახლოება ძალიან ჰგავს 1892 წელს რეალისტი მხატვრის, ნიკოლაი დუბოვსკოის მიერ დახატულ ტილოს.

8. დედამიწის ჩასვლა

შემდეგი 6 აპრილს, ხომალდ Artemis II-დან ნასას ასტრონავტ ქრისტინა კოხის მიერ გადაღებული ფოტოა, რომელშიც ფერადი დედამიწა მთვარის უსიცოცხლო, ნაცრისფერი ზედაპირის მიღმა ნელ-ნელა ჩადის. კოსმოსის ცივ და ბნელ სიცარიელეში მარტოდ დარჩენილი პლანეტა სწორედ ისეთი დაუცველი ჩანს, როგორიც იერონიმუს ბოსხის გენიალურ ტილოზე — Garden of Earthly Delights.

9. საფეხბურთო მოედანი ღაზაში

ღაზაში გადაღებულმა სატელიტურმა ფოტომ, რომელშიც ისრაელთან ორწლიანი კონფლიქტის შედეგად განადგურებულ ნანგრევებს შორის მწვანე საფეხბურთო მოედანი ჩანს, მსოფლიო გააოცა. კონტრასტი მოედნის იდეალურ გეომეტრიასა და მის მიღმა არსებულ მწარე რეალობას შორის, ექსპერტების აზრით, ძალიან ჰგავს ძველ სპარსულ სტილს, რომელსაც Chahar Bagh-ს (ოთხ ბაღს) უწოდებდნენ.