რუსეთის საგარეო საქმეთა სამინისტროს პრესსპიკერის, მარია ზახაროვას განცხადებით, სომხეთში საპარლამენტო არჩევნები ოპოზიციაზე უპრეცედენტო ზეწოლისა და დასავლეთის ჩარევის ფონზე ჩატარდა.

"7 ივნისს სომხეთში საპარლამენტო არჩევნები ოპოზიციაზე უპრეცედენტო ზეწოლისა და დასავლეთის, პირველ რიგში ევროკავშირის ჩარევის ფონზე ჩატარდა", — განაცხადა ზახაროვამ.

მისი თქმით, სომხეთს ცენტრალური საარჩევნო კომისიის მიერ გამოცხადებული წინასწარი შედეგები მიუთითებს, რომ პრემიერმინისტრ ნიკოლ ფაშინიანის "სამოქალაქო კონტრაქტის" პარტიამ, რომელმაც გამარჯვება გამოაცხადა, "ვერ უზრუნველყო ძალაუფლებაზე მონოპოლია". "უფრო მეტიც, წინა საარჩევნო ციკლთან შედარებით, მისი მხარდაჭერა შესამჩნევად შემცირდა", — თქვა ზახაროვამ.

მან განაცხადა, რომ რუსეთი სომხეთში თავისი სამომავლო მოქმედების კურსის ჩამოყალიბებას სომხეთის ხელმძღვანელობის მიერ გადადგმული ფაქტობრივი ნაბიჯების გათვალისწინებით გეგმავს.

"რაც შეეხება მოსკოვის მომავალ პოლიტიკას სომხეთთან ურთიერთობებში, ჩვენ ვაპირებთ ჩვენი კურსის ჩამოყალიბებას სომხეთის ხელმძღვანელობის მიერ გადადგმული ფაქტობრივი ნაბიჯების გათვალისწინებით", — აღნიშნა ზახაროვამ.

ზახაროვამ განაცხადა, რომ რუსეთი დაინტერესებულია ძლიერი და ჭეშმარიტად სუვერენული სომხეთით და რომ სომეხი ხალხი რუსეთის ფედერაციის მოძმეა.

"მოსკოვი ყოველთვის იყო და ყოველთვის იქნება დაინტერესებული ძლიერი და ჭეშმარიტად სუვერენული სომხეთით. სომეხი ხალხი ჩვენი მოძმეა და ჩვენ ვუსურვებთ მათ მშვიდობას და კეთილდღეობას. ამავდროულად, ბოლო არჩევნებმა ნათლად აჩვენა, რომ სომხური საზოგადოება უკიდურესად პოლარიზებულია", — აღნიშნა ზახაროვამ.

მისი თქმით, "ასეთ ვითარებაში, სომხეთის განვითარების გზაზე ცალმხრივი გადაწყვეტილებების მიღება მოსახლეობის ყველა ფენის აზრის გათვალისწინების გარეშე ნიშნავს ქვეყნის შემდგომ დაყოფასა და სოციალურ-ეკონომიკურ რყევამდე მიყვანას". "ჩვენ ველით, რომ სომხეთის ხელისუფლება იხელმძღვანელებს ეროვნულ ინტერესებზე დაფუძნებული მიდგომებით", — თქვა ზახაროვამ.

სომხეთში საპარლამენტო არჩევნებში პრემიერმინისტრ ნიკოლ ფაშინიანის პარტიამ "სამოქალაქო კონტრაქტმა" ხმების 49.81%-ით გაიმარჯვა.