პეტერ მადიარის ინიციატივით, უნგრეთის პარლამენტმა ქვეყნის სისხლის სამართლის საერთაშორისო სასამართლოს (ICC) იურისდიქციისგან გასვლის გადაწყვეტილება გააუქმა, რომელიც მანამდე ყოფილი პრემიერმინისტრის, ვიქტორ ორბანის მთავრობის მიერ იყო ინიცირებული.

ადგილობრივი მედიის ცნობით, უნგრეთის პარლამენტმა, ოთხშაბათს, 27 მაისს, მიიღო შესაბამისი კანონპროექტი, რომელიც ცვლის ICC-დან ქვეყნის გასვლას, "გამონაკლისი პროცედურების" გზით. კანონპროექტი წინა დღით მთავრობის სახელით ახალმა პრემიერმინისტრმა პეტერ მადიარმა წარადგინა.

პარლამენტში კენჭისყრის დროს, მადიარის "ტიზას" პარტიის ყველა წევრმა მისცა ხმა ქვეყნის სასამართლოს იურისდიქციიდან გასვლის გაუქმებას, ხოლო "ფიდესისა" და "ქრისტიან-დემოკრატიული სახალხო პარტიის" (KDNP) მთელმა კოალიციამ წინააღმდეგ მისცა ხმა. ხმების რაოდენობა 133-37-ის წინააღმდეგ იყო.

ბუდაპეშტმა საერთაშორისო სისხლის სამართლის სასამართლოდან გასვლის შესახებ რამდენიმე დღის წინ გადაიფიქრა.

როგორც ქვეყნის პრემიერმინისტრმა სოციალურ ქსელში 22 მაისს განაცხადა, მთავრობამ გააუქმა საერთაშორისო სისხლის სამართლის სასამართლოდან გასვლის შესახებ განცხადება, რომელიც წინა მთავრობამ 2025 წლის აპრილში წარადგინა. იმ დროისთვის არსებული ინფორმაციით, გასვლის ძალაში შესვლა დაახლოებით ერთი წლის შემდეგ იყო დაგეგმილი.

ჰააგაში მდებარე საერთაშორისო სისხლის სამართლის სასამართლო 2002 წლიდან იძიებს ყველაზე სერიოზულ დანაშაულებს, მათ შორის გენოციდს, ომის დანაშაულებს და კაცობრიობის წინააღმდეგ ჩადენილ დანაშაულებს. ევროკავშირის ყველა ქვეყანა სისხლის სამართლის საერთაშორისო სასამართლოს 100-ზე მეტ წევრ სახელმწიფოს შორისაა. უნგრეთმა 1999 წელს ხელი მოაწერა რომის სტატუტს, სისხლის სამართლის საერთაშორისო სასამართლოს დამფუძნებელ საერთაშორისო ხელშეკრულებას და ორი წლის შემდეგ რატიფიცირება მოახდინა.