დიდი ბრიტანეთის ხაზინის სანქციების ოფისმა რუსეთის სამხედრო მანქანის წინააღმდეგ დაწესებული სანქციების სია გააფართოვა. ოფიციალური გადაწყვეტილებით, სანქცირებულთა სიაში მოხვდა სამი კომპანია, რომლებიც საქართველოში არიან რეგისტრირებული.

ამის შესახებ ინფორმაცია 26 მაისს დიდი ბრიტანეთის მთავრობამ გაავრცელა, დღეს კი — საქართველოში დიდი ბრიტანეთის საელჩომ. მათი თქმით, "სანქცირებულ სუბიექტებთან მათ მიერ განხორციელებული ტრანზაქციების მოცულობა სულ მცირე 70 მილიონ დოლარს შეადგენს".

"გუშინ, დიდმა ბრიტანეთმა გამოაცხადა სანქციების ახალი პაკეტი, რომელიც მიმართულია კრიპტოვალუტის გაცვლის პლატფორმებისა და "A7 ქსელის" წინააღმდეგ. აღნიშნულ ქსელს რუსეთი იყენებს მოქმედი სანქციების გვერდის ავლის მიზნით და უკრაინის წინააღმდეგ სასტიკი ომის დასაფინანსებლად.

სანქციების პაკეტში შედის საქართველოში რეგისტრირებული სამი კომპანია, რომლებიც კრიპტო-გაცვლის პლატფორმებს იყენებენ რუსეთისთვის სანქციებისგან თავის არიდების მიზნით.

სანქცირებულ სუბიექტებთან მათ მიერ განხორციელებული ტრანზაქციების მოცულობა სულ მცირე 70 მილიონ დოლარს შეადგენს", — წერია საქართველოში დიდი ბრიტანეთის საელჩოს მიერ გავრცელებულ ინფორმაციაში.

ბრიტანეთის მთავრობის ვებგვერდზე განთავსებული დოკუმენტის თანახმად, სანქციები დაუწესდათ შემდეგ ქართულ იურიდიულ პირებს: Arvix LLC-ს (შპს არვიქს), Rapira Group LLC-სა (შპს რაპირა გრუპ) და Aifory LLC-ს (შპს ეიაიფორი). BMG წერს, რომ საქართველოს ბიზნეს რეესტრის მონაცემებით, დასახელებულ მესაკუთრეებს ქვეყანაში სხვა ბიზნესები არ ეკუთვნით.

შპს არვიქს (Arvix LLC): რეგისტრირებულია 2023 წლის 26 ოქტომბერს. მისი დირექტორი და 100%-იანი წილის მფლობელია თამაზ გარაევი.

შპს რაპირა გრუპ (Rapira Group LLC): რეგისტრირებულია 2022 წლის 9 ნოემბერს. ამჟამად კომპანია იმყოფება ლიკვიდაციის რეჟიმში (განაცხადი რეესტრში 13 მაისს დარეგისტრირდა), ხოლო მის მესაკუთრედ და ლიკვიდატორად მითითებულია ბრიტანეთის მოქალაქე ილიას აჰაევი.

შპს ეიაიფორი (Aifory LLC): რეგისტრირებულია 2023 წლის 23 ივნისს. მისი დირექტორი და 100%-ის მფლობელია მიხაელ გევორქიანი.

სანქციების გადაწყვეტილების თანახმად, ეს კომპანიები მართავენ რუსეთზე ორიენტირებულ ბირჟებს სანქციებისგან თავის არიდების მიზნით და დაკავშირებული არიან რუსულ კრიპტო გაცვლის ქსელ A7 network-თან.