ჟურნალისტი ჯეიჰუნ მუჰამედალი სოციალურ ქსელში სრულიად საქართველოს კათოლიკოს-პატრიარქის, შიო III-ის ქადაგებას გამოეხმაურა, რომელიც დემოგრაფიულ საკითხებს ეხებოდა. მუჰამედალის თქმით, მსგავსი შინაარსის გამოსვლები ქვეყნის არაქართველი და არამართლმადიდებელი მოქალაქეების გარიყვის განცდას აჩენს და ეროვნულ ერთიანობას აზიანებს.

ჟურნალისტი აღნიშნავს, რომ დემოგრაფიული გამოწვევების მოგვარება მსგავსი განცხადებებით კი არა, არამედ ეკონომიკური პრობლემების დაძლევითა და მოქალაქეების თანასწორი სიყვარულით არის შესაძლებელი.

"პატრიარქის ამ დღევანდელი გამოსვლის მერე მე კიდევ ერთხელ ჩემი თავი ამ ქვეყანაში მეორეხარისხოვნად ვიგრძენი და ვფიქრობ, ამ ქვეყანაში თურმე საფრთხე ვარ და ქვეყანაში სხვა ხალხებში ვითვლები და ქვეყანა მხოლოდ ქართველობის არის.

პ.ს ძალიან მწყდება გული აი ძალიან. ამ მართლაც სამოთხესავით ქვეყანაში ჩვენ ასეთი მიდგომით ერთობას ვერ მივაღწევთ ვერა. არადა მე ჩემს თავს აზერბაიჯანულ ენოვან ქართველობაში აღვიქვამდი სულ. ქრისტიანები და ქვეყანა ჩემი საკუთრივით მიყვარს. გულთან ყოველთვის ახლოს მიმაქვს ქვეყნის და ქრისტიანების ჭირიც და ლხინიც. ქვეყნის პატრიარქი ილია მეორე როგორ მიყვარდა ეს ბევრისთვის იყო ცნობილი. ქვეყნის 5-ჯვრიანი დროშა, ჰიმნი და ქრისტიანული რელიგიაც ჩემთვის ისეთივე ძვირფასია როგორც ისლამი. ასეთ განცხადებას რომ ვისმენ, ძალიან მწყინს.

დემოგრაფიული პრობლემებზე ზრუნვა ასეთი განცხადებებით არ ხდება. სიყვარულით, ერთობით, როგორც შენი, ასევე სხვისი რელიგიების სიყვარულით და ქვეყნის ეკონომიური პრობლემების მოგვარებით ხდება. ასეთი განცხადებები ქვეყნის ეთნოსით და რწმენით განსხვავებულ მოქალაქეების მიმართ ძალიან დიდ რისკებს უქმნის. ქვეყნიდან ხალხი გარბის და ეკონომიური პრობლემების გამო ხალხს შვილის შენახვა ეშინია.

ამ პრობლემებს სახელმწიფო თუ მოაგვარებს არც ერთი ქრისტიანი ქართველი ერთი ან ორი შვილით არ დაკმაყოფილდება. ამაში 100%-ით დარწმუნებული ვარ!

სხვათა შორის, დღეს პატრიარქის ამ გამოსვლის დროს მანდ ძალიან ბევრი მუსლიმიც უსმენდა და ესწრებოდა", — დაწერა ჯეიჰუნ მიჰამედალიმ სოციალურ ქსელში.

შეგახსენებთ, საქართველოს კათალიკოს-პატრიარქმა, შიო III-მ საქართველოში დემოგრაფიულ მდგომარეობაზე საუბრისას აღნიშნა, რომ "რეალურია იმის საშიშროება, რომ ქვეყანაში სხვა ხალხები დამკვიდრდებიან და რიცხობრივად ქართველებს გადააჭარბებენ".

"თუ არ გამოვასწორეთ ჩვენი დემოგრაფიული მდგომარეობა, თუ არ ვიზრუნეთ ოჯახის განმტკიცებაზე, გადარჩენაზე, შენარჩუნებაზე, ჩვენ გვემუქრება რეალური საშიშროება, რომ ჩვენ მშვენიერ სამოთხესავით ლამაზ და მშვენიერ ქვეყანაში დამკვიდრდებიან სხვა ხალხები, ჩვენთან ერთად, რომლებსაც უყვართ ბავშვები, რომლებიც არ იშორებენ შვილებს, რომლებიც იცავენ თავიანთ რელიგიას და ამიტომ კარგად მრავლდებიან. შეიძლება, ღმერთმა დაგვიფაროს, რა თქმა უნდა, მაგრამ ასე თუ გავაგრძელეთ ჩვენ, ეს საშიშროება რეალურია, რომ გადააჭარბონ რიცხობრივად ქართველობას. მადლი მოგცეს უფალმა, რომ ვიშრომოთ, ვიღვაწოთ ოჯახის გადარჩენისთვის, ოჯახური ღირებულებების დაცვისთვის, რომ ვიქონიოთ ისეთი კანონმდებლობა, რომელიც დაიცავს ოჯახს, ჩვენს ხალხს მავნე გენდერული თეორიებისგან, იდეოლოგიისგან. უარი კი არ უნდა ვთქვათ ამ კანონმდებლობაზე, როგორც ზოგიერთები მოგვიწოდებენ, არამედ პირიქით, უნდა გავაძლიეროთ და განვამტკიცოთ ეს მიმართულება, ოჯახის დაცვის და შენარჩუნების. ეს არის ჩვენი ქვეყნის გადარჩენის, გამრავლების საწინდარი, ასევე ღვთის წყალობის", — აღნიშნა შიო III-მ.