თბილისის მერია საბურთალოზე, დანელიას ქუჩაზე კლდის ჩამოშლასთან დაკავშირებით განმარტებას აკეთებს. უწყების ინფორმაციით, 13 მაისს სამშენებლო ობიექტზე კლდის ნაწილი ჩამოიშალა, რამაც მძიმე ტექნიკა დააზიანა. მომხდარის გამო მუნიციპალურმა ინსპექციამ კომპანია "იდეა პანორამა 2" უსაფრთხოების ნორმების დარღვევისთვის დააჯარიმა და სამუშაოები შეაჩერა.

მერიაში განმარტავენ, რომ მშენებლობა ნებართვის ფარგლებში მიმდინარეობდა, თუმცა დაირღვა უსაფრთხოების ტექნიკური რეგლამენტი. სამუშაოების განახლება მხოლოდ მას შემდეგ გახდება შესაძლებელი, რაც მომზადდება გამაგრებითი პროექტი, ჩატარდება ექსპერტიზა და ფერდის მდგრადობა სრულად იქნება უზრუნველყოფილი.

"დანელიას ქუჩაზე მშენებლობა ნებართვის ფარგლებში ხორციელდება. ამ ეტაპზე, თბილისის მუნიციპალურმა ინსპექციამ მშენებლობის პროცესი შეაჩერა და მშენებელი უსაფრთხოების ნორმების დარღვევაზე დააჯარიმა 30 000 ლარით.

ვაკის რაიონში N01.14.05.009.142 საკადასტრო კოდით რეგისტრირებულ მიწის ნაკვეთზე თბილისის არქიტექტურის სამსახურის 2026 წლის 6 მარტის N7832707 ბრძანებით შეთანხმდა მრავალბინიანი სახლის კორექტირებული არქიტექტურული პროექტი. მშენებლობის ვადა განისაზღვრა 2026 წლის 6 მარტიდან 2029 წლის 6 მარტის ჩათვლით. (დამკვეთი: "იდეა პანორამა 2" (ს/ნ 405606045)).

მიმდინარე წლის 13 მაისს ობიექტზე დაფიქსირდა ფერდის (კლდის) ნაწილის ჩამოშლა, რამაც გამოიწვია სამშენებლო მოედანზე მომუშავე მძიმე ტექნიკის დაზიანება.

გამომდინარე იქიდან, რომ დაირღვა საქართველოს მთავრობის 27.05.2014 წლის N361 დადგენილება "მშენებლობის უსაფრთხოების შესახებ ტექნიკური რეგლამენტის დამტკიცების შესახებ", სამსახურმა სამართალდამრღვევი პირის მიმართ 2026 წლის 13 მაისს მიიღო N003980 დადგენილება 30 000 ლარით დაჯარიმების შესახებ.

ასევე, სამშენებლო პროცესის შეჩერების დადგენილება (N შ-150/26 13.05.2026 წ.), რომელიც ძალაშია მშენებლობის უსაფრთხოების წესების უზრუნველყოფამდე. კერძოდ, საჭიროა შესაბამისად დამუშავებული კონსტრუქციული პროექტისა და საექსპერტო დასკვნის საფუძველზე განხორციელდეს გამაგრებითი სამუშაოები, რომლითაც უზრუნველყოფილი იქნება ფერდის მდგრადობა და მომიჯნავე საკადასტრო კოდებზე არსებული შენობა-ნაგებობებისა და საგზაო ინფრასტრუქტურის უსაფრთხოება. ასევე, გამაგრების სამუშაოების დასრულების შემდგომ, სავალდებულოა შესაბამისი საექსპერტო დასკვნის წარმოდგენა, რომლითაც დადასტურებული იქნება განხორციელებული სამუშაოების შესაბამისობა ფერდის გამაგრების პროექტთან და მომიჯნავე საკადასტრო კოდებზე არსებული შენობა-ნაგებობებისა და საგზაო ინფრასტრუქტურის უსაფრთხოება", — აცხადებენ მერიაში (განცხადებას IPN ავრველებს).

შეგახსენებთ, 13 მაისს პარტია გახარია საქართველოსთვის წევრმა, ტატა ხვედელიანმა სოციალურ ქსელში ვიდეო გამოაქვეყნა, სადაც ჩანდა, რომ კლდის ნაწილი ჩამოინგრა.

"ამ წუთებში დანელიას ქუჩაზე, საბურთალოზე ხდება ეს ფაქტი. ეს არის ოცნების ქაოტური და კორუმპირებული ურბანული პოლიტიკა, რომლის შედეგებსაც მერე მოქალაქეები ვიღებთ", — დაწერა ტატა ახვლედიანმა.